பணத்துக்கான தேடல் சரியா, தவறா?

மனிதன் தன் பொருளாதாரத்தை மேம்படுத்தும் வழிகளைத் தேடிக் கொண்டேதான் இருக்கிறான். பணமா முக்கியம்?" உங்களில் எத்தனை பேர் இந்த வார்த்தைகளை அடிக்கடி கேட்டிருக்கிறீர்கள்? என்னிடம் கூட சிலர் "ஏன் பொருளாதாரம் பற்றி எழுதுகிறீர்கள்? கடவுள், குடும்பம், சமையல் போன்ற விஷயங்கள் பற்றி எழுதலாம் அல்லவா?" என்று கேட்டிருக்கிறார்கள்.

- 

வார்த்தைகள் மிகவும் சக்தி வாய்ந்தவை. இவற்றைக் கேட்கும்போது ஏதோ பணம் தேடுவதும், அதற்கான வழிகள் பற்றிப் பேசுவதும் பாவம் என்பது போன்ற எண்ணம் தோன்றுகிறது அல்லவா? இது போன்ற கேள்விகள் செல்வத்தை நோக்கிய நம் பயணத்தில் நம்மைச் சோர்வடையச் செய்யும்.

பணம் முக்கியமல்ல என்று கூறுபவர்கள் மறந்துவிட்ட விஷயம் ஒன்று உண்டு. பணத்துக்கான முக்கியத்துவம் இன்று புதிதாக வந்தது அல்ல. கி.மு. மூன்றாம் நூற்றாண்டிலேயே இருந்ததற்கான சான்று உள்ளது. ஆம், அப்போது வாழ்ந்த வள்ளுவர் கூட அறத்துக்கு 380 குறள்களும், இன்பத்துக்கு 250 குறள்களும் எழுதி விட்டு, பொருட்பாலுக்குத்தானே 700 குறள்கள் எழுதியிருக்கிறார்?

இன்றும் இணையதளங்களின் ஹாட் டாபிக் காசு, பணம், துட்டு, மணி! துறவிகள் கூட"அத்தனைக்கும் ஆசைப்படு" என்று கூறும் காலம் இது. மனிதன் தன் பொருளாதாரத்தை மேம்படுத்தும் வழிகளைத் தேடிக்கொண்டேதான் இருக்கிறான். ஏனெனில் பணம் என்பது உலக இன்பங்களோடு, மனத் திருப்தியையும், ஆத்ம சாந்தியையும் கூடத் தரவல்லது.

தங்கைக்கு ஒரு சுடிதார், தாத்தாவுக்கு ஒரு கைத்தடி, பாட்டிக்கு ஒரு பல்செட் இப்படியெல்லாம் நம் முதல் சம்பளத்தில் வாங்குவதில் நமக்கு எத்தனை மகிழ்ச்சி! நாம் எடுத்த ஹெல்த் இன்சூரன்ஸ் நம் பெற்றோருக்கு உதவும்போது எத்தனை மனத்திருப்தி! கடன் வாங்கியாவது நம் குழந்தைகளைப் படிக்க வைப்பது எத்தனை பெருமை!

நம் போன்ற சாமானியர்களுக்கு இவையெல்லாம் இன்பம் என்றால், வாரன் பபெட், பில் கேட்ஸ், அசிம் பிரேம்ஜி போன்ற பெரும் பணக்காரர்கள் கோடிகளைக் கொட்டி ஏழைகளுக்கு உதவுவது முழுக்க முழுக்க அறம்! "பொருள் கொண்ட பேர்கள் மனம் கொண்டதில்லை; தரும் கைகள் தேடி பொருள் வந்ததில்லை" என்ற வாலியின் வரிகளைப் பொய்யாக்கி விட்டவர்கள் இவர்கள். ஆகவே அறமும், இன்பமும் ஒன்றாகத் தரவல்ல இந்தப் பொருளைச் சம்பாதிக்கவும், பெருக்கவும் நாம் முயற்சி செய்வதில் எந்தத் தவறும் இல்லை!