EERS GETEIKEN, TOE SLAGOFFER

Jongman (22) glo wreed vermoor deur bende wat hom al lank eye

- CHRISLYNN SIAS-LOUW

WAT haar die seerste maak, is as die polisie na hulle pleidooie geluister het, sou hulle kind nog gelewe het, maar nou is sy lewe tragies kortgeknip deur 'n "bende-groep" wat 'n skrikbewind in Langebaan voer.

Só vertel die hartseer Magdalena "Vicky" Links (49) van Seaview Park in Langebaan.

Eljaro Links (22) is dood nadat hy Sondagoggend in die vroeë oggendure na bewering wreed deur die Remy-bende aangerand is.

Dit is dié gang wat hom al die afgelope drie jaar teister, volgens sy antie Vicky.

Volgens dié vrou het dieselfde groep sowat drie jaar terug een van Eljaro se vriende doodgemaak en hulle woorde aan hom was dat hy volgende op die lys is. Sedertdien jag hulle hom.

Weggewys

Sy vertel: "Hulle het al my huis se ruite uit kom gooi en ook klippe op ons dak. Ons was in en uit by die polisiestasie om te hoor of daar nie iets is wat die polisie kan doen nie.

"Al is dit net om die kinders te gaan waarsku.

"Ons is elke keer weggewys en gesê hulle kan ons nie help nie."

Vicky sê dit lyk of Eljaro se dood 'n afgespreekte saak was, want die groep het voorgegee dat hulle vrede met hom gemaak het.