HEINING UIT DIE HEL ...

TERWYL die meeste mense sonder enige probleme toegang tot hulle erf kan kry, is daar een man vir wie dit 'n probleem is.

- 

Conrad Pietersen van Heidelberg sukkel nou al amper twee jaar om voldoende toegang tot sy erf te kry nadat dit deur sy bure omhein is.

Pietersen is die eienaar van erf 523, en die vorige eienaar van die aangrensende erf is oorlede.

Intussen het nuwe mense ingetrek en die erf omhein.

Pietersen sê nou het net voetgangers toegang tot sy huis.

Hy beweer die bure het skielik besluit om ná byna 50 jaar dat die erf oop was, dit toe te maak sonder om hom daarvan in kennis te stel.

“Ek het nie voldoende toegang tot my jaart nie. My voertuie kan nie eens in my jaart staan nie,” sê Pietersen ontsteld.

Hy is nou gedwing om 'n klein hekkie by sy erf aan te bring, en sy voertuie kan nie daardeur nie. Hy moes gevolglik ander parkeerplek vir sy kar en bakkie kry.

Dis vir hom uiters ongerieflik, want voorheen kon hy voertuie in sy erf parkeer.

Sy grootste bekommernis is wanneer hy dalk mediese hulp nodig het of 'n brand by sy huis ontstaan.

“Hoe gaan die ambulans toegang kry as my vrou siek is of hoe gaan die brandweer by my erf inkom as hier 'n brand uitbreek?”