Gwireddu breuddwyd wrth i denor gael ei goroni'n ganwr ifanc gorau'r byd gan weddw'r seren opera Luciano Pavarotti

AE tenor dawnus oedd yn breuddwydio am efelychu'r cawr operatig Luciano Pavarotti wedi cael ei goroni'n ganwr ifanc gorau'r byd gan weddw'r diweddar feistr.

- 

Dywedodd Andrew Henley, 34 oed, fod ennill cystadleuaeth Llais Rhyngwladol y Dyfodol Pendine yn Eisteddfod Ryngwladol Llangollen yn "gwireddu breuddwyd" a bod derbyn y wobr gan Nicoletta Mantovani yn anrhydedd "anhygoel".

Enillodd fuddugoliaeth yn y pafiliwn eiconig ar ôl cystadleuaeth gyffrous yn erbyn y soprano dalentog Eiry Price, o Bencaenewydd, yng Ngwynedd.

Roedd Andrew, o Drefynwy, yn falch iawn o dderbyn ei wobr gan weddw Pavarotti, Nicoletta, sydd bellach wedi ailbriodi gyda'r ymgynghorydd ariannol Alberto Tinarelli oedd yn bresennol gyda hi yn Llangollen.

Gwnaeth daith arbennig i ogledd Cymru ar gyfer dathliad dwbl ymddangosiadau Pavarotti yn Eisteddfod Llangollen, ymddangosiadau a fu'n gyfrifol am danio ei yrfa.

Mae'n 70 mlynedd ers i'r Luciano ifanc berfformio am y tro cyntaf erioed yn Llangollen gyda chôr ei dad, Corws Rossini, yn 1955, ac mae hefyd yn 30 mlynedd ers iddo ddychwelyd fel seren ryngwladol yn 1995 pan ganodd mewn cyngerdd mawreddog.

Talodd Nicoletta deyrnged i berchnogion sefydliad gofal Parc Pendine, Mario Kreft MBE, a'i wraig, Gill, a noddodd y gystadleuaeth drwy Ymddiriedolaeth Celfyddydau a Chymuned Pendine sy'n cefnogi gweithgareddau diwylliannol a chymunedol.

Gofynnodd yn benodol am gael cyflwyno gwobr Pendine, sef tlws arian hardd, oherwydd ei bod hi a Pavarotti yn angerddol am gefnogi ac annog doniau ifanc sy'n ceisio datblygu eu gyrfa.

Ers ei farwolaeth mae Nicoletta wedi dechrau Sefydliad Luciano Pavarotti, corff dielw sy'n ymroddedig i gadw ei gof yn fyw a chefnogi cantorion opera ifanc addawol.