அனைத்து ஆலயங்களிலும் அன்னைத் தமிழை அரங்கேற்றுவோம்...

குலதெய்வ வழிபாட்டில் இருந்து பெருந்தெய்வ வழிபாட்டிற்கு மாறிய நிலையில், அதற்கேற்ப ஆகம விதிகள் வகுக்கப்பட்டன. ஆகமங்கள் என்பது இந்து சமயத்தின் சைவ, வைணவ, சாக்தப் பிரிவுகளின் தத்துவங்கள், வழிபாட்டு முறைகள், கோயில்களின் அமைப்பு, மந்திரங்கள் போன்றவற்றைக் கூறும் நூல்களாகும்.

- 

இவை சமஸ்கிருதத்தில் சொல்லப்பட்டாலும், பெரும்பாலும் தென்னிந்தியாவிலேயே புழக்கத்தில் உள்ளதால் நம் முன்னோர்கள் வகுத்த நெறிகளாகவே நம்பப்படுகின்றன. குறிப்பாக தமிழில் எழுதப்பட்டு சமஸ்கிருத மயப்படுத்தப்பட்டதாகவே சான்றோர்கள் கூறுகின்றனர். ஆகமங்கள், கோயில் அமைப்பு, வழிபாட்டு விதிகள், ஓத வேண்டிய மந்திரங்கள், ஆகியவற்றோடு, சமயங்களின் அடிப்படை தத்துவங்களையும் விளக்குகின்றன.

ஆகமமே தமிழில் இருந்தது என்பது உறுதியாகும் நிலையில், ஆகமங்களின் குறிப்பிடப்படும் வழிபாட்டு நடைமுறைகள், சடங்காச்சாரங்கள் சமஸ்கிருதமாகவே இருப்பது ஆய்வுக்குரியதாக அமைகிறது.

குறிப்பாக குடமுழுக்கு (கும்பாபிஷேகம்) விழாக்களில் சமஸ்கிருத மந்திரங்களே கோயிலில் ஓதப்படுகின்றன. தமிழிலேயே திருமறைகள், திருமந்திரங்கள் உள்ள நிலையில் அவற்றை ஓதாது, சமஸ்கிருத ஸ்லோகங்களை ஓதுவதால் பக்தர்கள் இறைவழிபாட்டோடு ஒன்ற முடியாமல் போகிறது.