தமிழர்கள் எங்கு வாழ்ந்தாலும் ஒற்றுமையாக வாழ வேண்டும்

அயலக தமிழர் விழாவில் முதல் அமைச்சர் மு. க. ஸ்டாலின் பேச்சு

- 

மாண்புமிகு தமிழ்நாடு முதலமைச்சர் திரு. மு.க.ஸ்டாலின் அவர்கள் இன்று (12.1.2026) சென்னை, நந்தம்பாக்கம், சென்னை வர்த்தக மையத்தில் அயலகத் தமிழர் நலன் மற்றும் மறுவாழ்வுத் துறை சார்பில் நடைபெற்ற "அயலகத் தமிழர் தினம் - 2026" விழாவில், அயலகத் தமிழர்களுக்கு விருதுகளை வழங்கி, ஆற்றிய உரை.

தாய் மண்ணான தமிழ் மண்ணிற்கு வந்திருக்கக்கூடிய உங்கள் எல்லோருக்கும் அயலகத் தமிழர் நாள் வாழ்த்துக்களைச் சொல்லி, புத்தாண்டு வாழ்த்துகளையும், தமிழர் திருநாளாம் பொங்கல் வாழ்த்துகளையும் சொல்லி, வருக! வருக! வருக! என வரவேற்கிறேன்!

தமிழ்நாட்டின் முதலமைச்சராக மட்டுமல்ல, உங்களின் உடன்பிறப்பாக நான் வரவேற்க கடமைப்பட்டிருக்கிறேன். உலகின் பல நாடுகளிலும், இந்தியாவின் மற்ற மாநிலங்களிலும், தமிழர்களான நீங்களும், உங்களின் குடும்பத்தாரும், பல முக்கிய பொறுப்புகளிலும், நல்ல நிலையிலும் இருப்பதை நினைத்து நான் பெருமைப்படுகிறேன்! மகிழ்ச்சி அடைகிறேன்!