"77சதவீத ஒப்பந்தங்கள் செயல்பாட்டுக்கு வந்தன"- முதல் அமைச்சர் மு.க. ஸ்டாலின் உரை

ஓசூரில் நேற்று நடந்த தொழில் முதலீட்டாளர்கள் மாநாட்டில் ரூ. 24,307 கோடிக்கு முதலீடுகள் சேர்க்கப்பட்டது. இந்த நிகழ்ச்சியில் முதல் அமைச்சர் மு.க. ஸ்டாலின் பேசுகையில்," இதுவரை கையெழுத்தான ஒப்பந்தங்களில் 77 சதவீத ஒப்பந்தங்கள் செயல்பாட்டுக்கு வந்தன, ஓசூரில் 2 ஆயிரம் ஏக்கரில் சர்வதேச விமான நிலையம் அமைக்கப்படும்" என குறிப்பிட்டார்.

- 

ஓசூரில் தமிழ்நாடு முதலமைச்சர்மு.க.ஸ்டாலின் நேற்று (11.9.2025) தொழில், முதலீட்டு ஊக்குவிப்பு மற்றும் வர்த்தகத் துறை சார்பில் நடைபெற்ற "தமிழ்நாடு முதலீட்டாளர்கள் மாநாட்டில் பேசிய பேச்சு விவரம் வருமாறு ஜெர்மனி மற்றும் இலண்டன் ஆகிய ஐரோப்பிய பயணத்தை முடித்துவிட்டு 15 ஆயிரத்து 516 கோடி ரூபாய் முதலீட்டுடன் தமிழ்நாட்டிற்குத் திரும்பிய மூன்று நாளில், இந்த முதலீட்டாளர் மாநாடு மூலமாக உங்களையெல்லாம் சந்திப்பதில் நான் மிகுந்த மகிழ்ச்சியடைகிறேன்! அதாவது நான் சென்றுவந்த பயணத்தில், 15 ஆயிரத்து 516 கோடி ரூபாய் முதலீடு என்றால், இன்றைக்கு இங்கு 24 ஆயிரம் கோடி ரூபாய் முதலீடுகள் கையெழுத்தாகியிருக்கிறது! நம்முடைய ரெக்கார்டை நாம்தான் பீட் செய்கிறோம்!

அதுமட்டுமல்ல, 8 ஆயிரம் பேருக்கு வேலைவாய்ப்பு அளிக்கக்கூடிய 1210 கோடி ரூபாய் முதலீட்டில், 4 திட்டங்களுக்கு அடிக்கல் நாட்டியிருக்கிறேன். ஓசூர் - திறமையும், புதுமையும் சந்திக்கும் நகரமாக இருக்கிறது! தமிழ்நாட்டின் தொழில் வரைபடத்தில் தனித்த அடையாளம் பெற்ற நகரம் ஓசூர்! வளர்ச்சியின் முகம்!