ജയിലിലെ നിയമങ്ങൾ

വിവിധ യൂണിഫോം തസ്തികകളിലേക്കുള്ള പരീക്ഷകൾക്കുവേണ്ടി തയ്യാറെടുക്കുന്നവർക്ക് ജയിലിലെ നിയമങ്ങൾ പരിചയപ്പെടാം

- സുരേഷ് വണ്ടന്നൂർ

ജയിൽ എന്ന് കേട്ടാലേ മനുഷ്യരിൽ ഭയം ഫണം വിടർത്തിയിരുന്ന ഒരു കാലമുണ്ടായിരുന്നു. എന്നാൽ ഇന്ന് കുറ്റവാളികളുടെ മാനസിക പരിവർത്തന കേന്ദ്രങ്ങളായി കേരളത്തിലെ ജയിലുകൾ മാറിക്കൊണ്ടിരിക്കുകയാണ്. കുറ്റകൃത്യങ്ങൾ തടയുക എന്നതാണ് തടവറകളുടെ ലക്ഷ്യം. തെറ്റുതിരുത്തി മനഃപരിവർത്തനത്തിലൂടെ കുറ്റവാളികളെ സമൂഹത്തിന് പ്രയോജനമുള്ളവരാക്കിത്തീർക്കുകയാണ് ഇന്നത്തെ സർക്കാരുകളും ജയിലധികൃതരും ചെയ്തുവരുന്നത്.

ജയിലുകളുടെ ഭരണം, തടവുകാരുടെ സംരക്ഷണം എന്നീ കാര്യങ്ങളുടെ ചുമതലയുള്ള വകുപ്പാണ് ജയിൽ വകുപ്പ്. തടവുകാരുടെ ക്ഷേമം ഉറപ്പാക്കുക, അവരെ കുറ്റവാസനയിൽ നിന്ന് വിമുക്തരാക്കി നല്ലവരാക്കിത്തീർക്കുക എന്നിവയാണ് പ്രത്യേക പരിശീലനം ലഭിച്ച ജയിൽ ഉദ്യോഗസ്ഥരുടെ ജോലി. കേരളത്തിൽ ഡയറക്ടർ ജനറൽ ഓഫ് പ്രിസൺസ് ആൻഡ് കറക്ഷണൽ സർവീസസ് ആണ് ജയിൽ വകുപ്പിന്റെ അധ്യക്ഷൻ. സാധാരണയായി സൂപ്രണ്ടാണ് ഒരു ജയിലിന്റെ തലവൻ.

ജയിലുകളുടെ ശേഷി, സുരക്ഷാ സൗകര്യങ്ങൾ, ഉദ്യോഗസ്ഥർ എന്നിവ അടിസ്ഥാനപ്പെടുത്തി കേരളത്തിൽ എട്ടുതരം ജയിലുകളാണുള്ളത്. സെൻട്രൽ ജയിലുകൾ, ജില്ലാ ജയിലുകൾ, സ്പെഷ്യൽ സബ് ജയിലുകൾ, സബ് ജയിലുകൾ, സ്ത്രീകളുടെ ജയിലുകൾ, ഓപ്പൺ ജയിലുകൾ, ബോർസ്റ്റൽ സ്കൂളുകൾ, ഒരു ഹൈടെക് സെക്യൂരിറ്റി ജയിൽ എന്നിവയാണ് ഉള്ളത്. ഇവിടെ കുറ്റവാളികളായ തടവുകാർ, വിചാരണത്തടവുകാർ, റിമാൻഡ് പ്രതികൾ, ഡെറ്റിന്യൂകൾ, ഇന്റേണികൾ, സിവിൽ തടവുകാർ എന്നിവരെ പാർപ്പിച്ചിരിക്കും.