கடவூராரின் மணக்கும் படல்கள்!

மடல் மூன்று வகைப்படும். அவை தாழை மடல், வாழை மடல், பனை மடல். சிலப்பதிகாரம் எழுதப்பட்ட காலமான கி. பி. இரண்டாம் நூற்றாண்டில் மடல் மூலமே தகவல்கள் பரிமாறப்பட்டன. சிலப்பதிகாரத்தில் கோவலனுக்கு தாழை மடல் மூலம் ஒரு செய்தி அனுப்பியதாக பாடல் உண்டு. அது முதல் இன்று வரை மடல் என்னும் பதம் வழக்கத்தில் உள்ளது. பெரும்பாலும் மரபுக் கவிஞர்களே மடல் என்னும் சொல்லை பயன்படுத்தி வருகின்றனர். மரபு இருக்கும் வரை மடல் இருக்கும். மரபும் இருக்கும். மடல் இருக்கும்.

- By பொன். குமார்

மடல் எழுதுவது ஒரு கலை. தொலைபேசி வருவதற்கு முன்பு மடல் எழுதுவது ஒரு பெரும் பணியாக இருந்தது. கடமையாக இருந்தது. மடல் மூலமே அத்தனை தகவல்களும் பரிமாறப்பட்டன. தபால்காரர்களும் தந்து உதவினர். அலைபேசி வந்த பிறகு அரிதாகிவிட்டது மடல் எழுதும் கலை. பேச்சோடு முடிந்துவிடுகிறது. தொழில் நுட்பங்கள் வழி செய்திகள் பரிமாறப்பட்டு வருகின்றன.

முனைவர் கடவூர் மணி மாறன் 1970 முதல் இலக்கிய உலகில் இயங்கி வருகிறார். எழுபதுக்கும் மேற்பட்ட தொகுப்புகளை வெளியிட்டுள்ளார். இலக்கிய அறிஞர்களுடன் இலக்கிய ஆர்வலர்களுடனும் தொடர்பிலும் இருப்பவர். அறிஞர் களுக்கு ஆர்வலர்களுக்கு மடல்கள் எழுதுவதும் மடல்கள் பெறுவதும் பெறும் மடல்களுக்கு பதிலிடுவதும் ஒரு தொடர் பணியாகக் கொண்டிருப்பவர். இப்பணிகளுடன் தான் பெற்ற மடல்களை எல்லாம் பொன் போல் காத்து வந்ததுடன் அம்மடல்களைத் தொகுத்து 'மணக்கும் மடல்கள்' என்னும் தொகுப்பாக்கித் தமிழ் இலக்கிய உலகிற்கு தந்துள்ளார்.

இத்தொகுப்பு குறித்து எனக்கு எழுதிய மடலில் 'மணக்கும் மடல்கள் அனுப்பி உள்ளேன். 146 ஆளுமைகள் குறித்து ஏழு பகுப்புகளில் 600 பக்கங்களில் ஓர் இலக்கிய ஆவணமாக பல்வேறு வரலாற்றுச் செய்திகளை உள்ளடக்கிய கருவூலமாக இதனைக் கொணர்ந்துள்ளேன்' என்று எழுதியுள்ளார். இது முற்றுமுதலான உண்மை என மணக்கும் மடல்கள் தொகுப்பினை வாசிப்பவர்கள் உணர முடியும். மடல்களை ஆவணப்படுத்தியது காத்து வைத்திருந்தது ஒரு பாராட்டிற்குரிய செயல் என்றால் அம்மடல்களைத் தொகுத்து ஒரு பெரும் தொகுப்பாக்கியிருப்பது போற்றுதலுக்குரியது.

மடல்கள் எழுதிய மாமனிதர்களை ஏழு வகையாக பிரித்துத் தந்துள்ளார். அவை அரசியலார், அயலகத் தமிழறிஞர்கள், அருந்தமிழ்ச்சான்றோர், எழுத்துலக ஏந்தல்கள், பாவலர்கள், உழுவலன்பினர் என்பதாகும்.

அரசியலாரின் முதல் மடலாக முன்னாள் முதல்வர் முத்தமிழறிஞர் மு. கருணாநிதியின் வாழ்த்து மடல். மடலுக்கு கலைஞருடன் சந்தித்து உரையாடியதை மகிழ்வுடன் பகிர்ந்துள்ளார். இரண்டாவதாக மடல் எழுதியவர் வரிசையில் இடம் பெற்றிருப்பவர் பேராசிரியர் அன்பழகன்.