ઘરની અંદરથી નીં5ળતો બહારનો સંબંધ

સ્ત્રી અને પુરુષ લગ્નબાહ્ય સંબંધને એકમાત્ર વિકલ્પ ગણાવી વિવાહજીવનની મર્યાદા ઓળંગે ત્યારે..

- ડૉ. મિતાલી સમોવા

સામાજિક પ્રાણી હોવાને કારણે માણસ સૃષ્ટિના બીજા જીવ કરતાં જુદો પડે છે. માણસની બીજી ખાસિયત છે એના વિશેની અનિશ્ચિતતા. જેનાં વાણી, વર્તન, વ્યવહાર વિશે ક્યારેય કોઈ પૂર્વધારણા કે અનુમાન ન કરી શકાય એવું અનપ્રિડિક્ટેબલ પ્રાણી છે માણસ. આજનો સૌથી વફાદાર મિત્ર કાલે સૌથી મોટો વેરી બની જાય અને અત્યારનો જાની દુશ્મન આવતી કાલે તમને મોતના મુખમાંથી હેમખેમ ઉગારી લે એ શક્ય છે. સંબંધોનું રાજકારણ ખરેખર તો રાજકીય તાણાવાણા કરતાં પણ વિચિત્ર હોઈ શકે છે.

સંબંધ જેટલો અંગત એટલો એ દગાની આડઅસર વધારે. એમાં પણ વ્યક્તિના સૌથી અંગત સંબંધ મતલબ કે પ્રેમસંબંધ કે લગ્નસંબંધમાં તો દગો માણસના વ્યક્તિત્વ અને આત્મસમ્માનને સૌથી વધુ ઠેસ પહોંચાડે છે. સ્ત્રીી-પુરુષના સંબંધોમાં તકરાર અને હત્યાનું સૌથી મોટું કારણ કોઈ હોય તો એ છે લગ્નબાહ્ય સંબંધ કે એક્સ્ટ્રા મેરિટલ અફેર. દુનિયાભરમાં અલગ અલગ વિસ્તારોમાં હત્યામાં સીધા કે આડકતરા કારણરૂપ બનતા લગ્નબાહ્ય સંબંધોનું પ્રમાણ ૪૨થી ૬૫ ટકા જેટલું ઊંચું છે, જે હત્યાના કુલ કિસ્સાનું અડધોઅડધ પ્રમાણ ગણાય. જોખમ સમજાય છે?