કેજરીવાલની ધરપકડ વિપક્ષોને એક નહીં કરી શકે!

આ પણ કેવી વક્રતા... સરકારી યંત્રણામાં ચાલતી ગેરરીતિ અને ભ્રષ્ટાચાર સામે અવાજ ઉઠાવી રાજકારણમાં આવેલા અરવિંદ કેજરીવાલ પોતે જ અત્યારે ભ્રષ્ટાચારના આરોપી બન્યા છે.

- હીરેન મહેતા

સામાજિક કાર્યકર અણ્ણા હજારેના સહકારી તરીકે અગિયાર-બાર વર્ષ પહેલાં ભ્રષ્ટાચાર સામે આદરેલી લડાઈનો રેલો ભ્રષ્ટાચારના જ આરોપ સાથે ખુદ અરવિંદ કેજરીવાલના આંગણે આવીને અટક્યો છે. લોકસભાની ચૂંટણી માથે છે ત્યારે આમ આદમી પાર્ટીના સર્વોચ્ચ નેતા કેજરીવાલને કસ્ટડીભેગા કરવામાં આવ્યા છે. આ કેસમાં અગાઉ આમ આદમી પાર્ટીના બે વરિષ્ઠ આગેવાનો ઘણા સમયથી કારાવાસમાં છે એ હિસાબે તો કેજરીવાલ પણ ખાસ્સો સમય અંદર રહે એમ લાગે છે.

કેજરીવાલના નેતૃત્વ હેઠળની દિલ્હી સરકારે આબકારી જકાત (એક્સાઈઝ) રૂપે આવક વધારવાના નામે ૨૦૨૧માં દારૂના વેચાણને લગતી સરકારી નીતિ બદલી હતી. જો કે એ નીતિ હેઠળ કેટલાક ખાનગી કૉન્ટ્રાક્ટરને ફાયદો કરાવવામાં આવ્યો હોવાના આક્ષેપ થતાં કેન્દ્ર સરકાર હસ્તક આવતા દિલ્હીના નાયબ રાજ્યપાલના કાર્યાલયે આ મામલાની તપાસ સીબીઆઈ અને એન્ફોર્સમેન્ટ ડિરેક્ટોરેટ (ઈડી) જેવી કેન્દ્ર સરકારની એજન્સીઓને સોંપી હતી. એ વખતથી જ કેજરીવાલ સામેનું પગલું અપેક્ષિત હતું. એન્ફોર્સમેન્ટ ડિરેક્ટોરેટ તરફથી કેજરીવાલને અનેક વાર સમ હતાં. કેજરીવાલ ડિરેક્ટોરેટ સામે હાજર થતા નહોતા પણ મોકલ આવ્યાં એટલે જેવી દિલ્હી વડી અદાલતે એમની આગોતરા જામીનની અરજી નકારી એ સાથે મોકો જોઈને એમની ધરપકડ કરવામાં આવી. યોગાનુયોગ, લોકસભા ચૂંટણીનો કાર્યક્રમ બહાર પડ્યો એના થોડા જ દિવસમાં કેજરીવાલને પકડવાનો નિર્ણય લેવામાં આવ્યો એટલે આ ધરપકડ રાજકીય કિન્નાખોરીને કારણે કરવામાં આવી છે એવું બોલવાની ભાજપવિરોધી પક્ષોને તક મળી ગઈ.

ભાજપના વિરોધમાં હોય એવા ઘણા પક્ષના ઘણા આગેવાનો સામે ઈડી કે સીબીઆઈ જેવી કોઈ ને કોઈ સરકારી એજન્સીની તપાસ ચાલી રહી છે એ હકીકત છે. કેજરીવાલના રૂપે એમાં હવે એકનો ઉમેરો થયો છે. સવાલ એ છે કે ચૂંટણી ટાણે કેજરીવાલની ધરપકડ ભાજપને કોઈ ફાયદો કરાવશે? કે ભાજપવિરોધી પક્ષો આ પગલાંને મોદી સરકાર વિરુદ્ધ જનમત ઊભો કરવા માટે નિમિત્ત બનાવી કરશે?