હવે કન્ટેનર કરશે ભાવનગરને માલામાલ

કોરોના વાઈરસે લાખો માનવો માર્યા ને કરોડોને માંદા કર્યા, એ જ રીતે હજારો નાના ઉદ્યોજકોને પણ ખોખલા કરી નાખ્યા. સામા પક્ષે આ સમયગાળા દરમિયાન અનેક નવી ક્ષિતિજો ખૂલી, નવી દિશા મળી અને નવા ઉદ્યોગ પણ શરૂ થયા. આવું જ કંઈક ભાવનગરમાં થયું. કોરોનાને કારણે ભાવનગરમાં આંતરરાષ્ટ્રીય માપદંડ પ્રમાણેનાં કન્ટેનર બનાવવાનો ઉદ્યોગ શરૂ થયો. માત્ર શરૂ થયો એટલું જ નહીં, પરંતુ દેશનો એ ક્ષેત્રનો સૌથી મોટો ઑર્ડર મેળવી એને પૂરો કરવાની હામ આ ઉદ્યોગે ભીડી છે.

- જયેશ દવે (ભાવનગર)

આંતરરાષ્ટ્રીય ઔદ્યોગિક નકશામાં ભાવનગરને અત્યાર સુધી જે સ્થાન મળ્યું છે એનું શ્રેય શિપ રિસાઈકલિંગને આપવું રહ્યું. શિપ બ્રેકિંગ ઉદ્યોગ ભાવનગર અને તળાજા વચ્ચેના અલંગ ખાતે ૧૯૮૩માં શરૂ થયો અને એ સમયે ખેતી અને હીરા અને અન્ય નાના ઉદ્યોગ પર આધારિત ભાવનગરના અર્થતંત્રને નવી તાકાત મળી. સાથે ગુજરાતના એક ખૂણે આવેલા આ નાના શહેરને વિશ્વના ઔદ્યોગિક નકશા પર ઓળખ મળી.

સ્વાભાવિક જ કોઈ એક મોટા ઉદ્યોગની સાથે બીજા આનુષંગિક ઉદ્યોગો અને વ્યવસાયનો પણ વિકાસ થતો હોય છે. સુરતનો હીરા ઉદ્યોગ, રાજકોટનોમશીનરી ઉદ્યોગ અને એની સાથે શરૂ થયેલા અનેક નાના-મોટા ઉદ્યોગ-ધંધા એનું ઉદાહરણ છે એવી જ રીતે ભાવનગરમાં પણ શિપ રિસાઈકલિંગની સાથે જ અનેક નાના-મોટા વ્યવસાય શરૂ થયા. આ ઉદ્યોગમાં સૌથી મહત્ત્વનો કહી શકાય એ છે સ્ટીલ રિ-રોલિંગ એટલે કે લોખંડના સળિયા અને શીટ બનાવવાનો ઉદ્યોગ.

અલંગમાં ભંગાતાં જહાજમાંથી નીકળતા લોખંડમાંથી આકાર પામેલો આ ઉદ્યોગ પણ ઉતાર-ચડાવ વચ્ચે ચાલતો રહ્યો છે. આ ઉપરાંત, શિપ બિલ્ડિંગ ઈન્ડસ્ટ્રી પણ અહીં પગભર થવા જોર કરી રહી છે. વધુમાં સરકાર દ્વારા અમલમાં મુકાયેલી નવી વેહિકલ સ્ક્રેપ પૉલિસીના અમલ માટે પણ જૂનાં વાહનોને ભંગારમાં ફેરવવા આ જ ભાવનગર જિલ્લામાં ત્રણ ઉદ્યોગકારોએ પહેલ કરી છે.

ગુજરાતને આંગણે કન્ટેનર બનાવવાની શરૂઆતઃભાવનગરમાં આ ઉદ્યોાને અનુકૂળ માહોલ છે..

આ જ લોખંડ અને લૉજિસ્ટિક સાથે સંકળાયેલો ઔર એક ઉદ્યોગ ભાવનગરમાં ખીલી રહ્યો છે. એ છે કન્ટેનર મૅન્યુફેક્ચરિંગ ઉદ્યોગ. હજી બે વર્ષ પૂર્વે જ એની શરૂઆત થઈ અને આ ઉદ્યોગે આરંભિક તબક્કે જ જે હરણફાળ ભરી છે એ નોંધનીય છે.