આ કાફ્ટથી જીવનને રંગીન બનાવો!

માતા પાસેથી વારસામાં મળેલા કળાના ગુણ ખીલવવાનો અવસર એને પોતે બાળકને જન્મ આપ્યો ત્યારે મળ્યો. બે-બે વિષયમાં પોસ્ટ-ગ્રેજ્યુએશન કરવાની સાથે આ યુવતીએ નિતનવું શીખવાનું અને બીજાને શીખવવાનું શરૂ કર્યું અને...

- મોના શેઠ

લગન, ધૂન, ચાહ-પેંશન, આમ તો આ બધા  જશબ્દો એકમેકના પર્યાયવાચક છે. કોઈ તેઓ ના ખરા અર્થમાં પોતાનું જીવન પણ વ્યક્તિ જ્યારે આ શબ્દોને એના ખરા અર્થમાં જાણવા લાગે ત્યારે એ વ્યક્તિને અર્થસભર લાગવા લાગે. આ પૅશન કંઈ બધાને નસીબ નથી હોતું. રાત-દિવસ પોતાના પૅશનને કંડારતાં રહેવું, નિતનવાં પરિણામો સર્જતાં રહેવાં એ કંઈ નાનીસૂની વાત નથી. બસ, જાણે સમજી લો કે એ પણ એક પ્રકારનું મેડિટેશન, તપ કે સાધના છે!

જો કે આવું અમે નહીં, પણ મુંબઈના ગોરેગાવ સ્થિત ભક્તિ શાહનું દૃઢપણે માનવું છે. પંચ નીડલ આર્ટ, મેકરેન આર્ટ, રશિયન મિનિયેચર આર્ટ, રશિયન પંચ નીડલિંગ, લીંપણ આર્ટ, કૉફી પેન્ટિંગ, ચારકોલ પેન્ટિંગ, વિવિંગ, પેપર મૅશ પેન્ટિંગ, પેપર ક્રાફ્ટ, ઓરિગામી, ટાય ઍન્ડ ડાય, મોઝેક આર્ટ, એમડીએફ ડેકોરેટિવ આર્ટ, બૉટલ પેન્ટિંગ, ક્લે આર્ટ, ડેકોપાજ, મંડેલા વિવિંગ, ડ્રીમકૅચર વિવિંગ, ફેસ્ટિવલ ક્રાફ્ટ... એવા જુદા જુદા અનેક પ્રકારના આર્ટની વર્કશૉપ લેતાં ભક્તિ શાહ છેલ્લાં દસ-બાર વર્ષથી નાનાં બાળકોથી લઈને વયસ્ક મહિલાઓને શિખવાડી રહ્યાં છે.

ભક્તિ પ્રિયદર્શિનીને કહે છે: ‘કળાનું ક્ષેત્ર એટલું બધું વિશાળ છે કે થોડા થોડા સમયે મારે સુદ્ધાં નિતનવું શીખવું પડે છે. હું કંઈક નવું શીખું એટલે મને થાય કે ચાલો, હવે આ પણ બીજાને શિખવાડીએ. મને મજા પડે છે. રંગો, રંગબેરંગી સુશોભનની વસ્તુ, દોરા-આ બધાં મારા મિત્રો છે. કલાકો સુધી હું એમાં મારી જાતને વ્યસ્ત રાખી શકું છું.’

ખરેખર, કોવિડ પહેલાં આ વર્કશૉપ દરમિયાન એમના વિદ્યાર્થીઓ વચ્ચે થતો સંવાદ ભક્તિના જીવનમાં ઊર્જા ભરી દેતો, પણ કોવિડ કાળમાં વર્કશૉપ બંધ થતાં એમના જીવનમાં હતાશા વ્યાપી ગઈ. જો કે હતાશા ખંખેરી ભક્તિ એમાંથી બહાર આવ્યાં.