ભાજપના ડબલ એન્જિનનું ઈંધણ કેમ ખૂટી ગયું?

કેન્દ્રીય નેતાગીરી પરનો વધુ પડતો આધાર કર્ણાટકમાં ભાજપને નડી ગયો. કોંગ્રેસનું ઘર વિભાજિત હતું, પણ ભાજપવિરોધી લાગણી અને રાજકીય સમીકરણોને પોતાની તરફેણમાં વાળી પંજાએ કમળને વધુ એક વાર ખીલતું અટકાવી દીધું.

- હીરેન મહેતા

કર્ણાટક વિધાનસભા પર કોંગ્રેસનો કબજો: સમીકરણનાં ચોકઠાં બરાબર ગોઠવાઈ ગયાં એનો ફાયદો મળ્યો.

હજી છ મહિના પહેલાં ગુજરાતમાં થયું એનું પુનરાવર્તન ભાજપ કર્ણાટકમાં ન કરી શક્યો. પાછલા ત્રણ-સાડા ત્રણ દાયકામાં કર્ણાટકની પ્રજાએ કોઈ એક પક્ષને સતત બે મુદત માટે ચૂંટ્યો નથી. પંજાબ સહિત કેટલાંક રાજ્યમાં આવી જાણે પરંપરા થઈ ગઈ છે. કર્ણાટકમાં ભાજપ આ પરંપરા બદલાવી ન શક્યો અને પક્ષને ભાગે પરાજય ખમવાનો વારો આવ્યો. કોંગ્રેસ રાજ્યસ્તરે દેખીતી રીતે બે જૂથમાં વિભાજિત લાગતી હોવા છતાં સ્પષ્ટ બહુમતી મેળવી શકી એ આ ચૂંટણીનું સૌથી મોટું જમાપાસું છે. એને કારણે ચૂંટણી પછી વિધાનસભ્યો ફોડવાની જે કવાયત કેટલાંક રાજ્યોમાં જોવા મળે છે  એનાથી કર્ણાટક અત્યાર પૂરતું તો બચી ગયું છે.

ચૂંટણી પરિણામમાં એક પક્ષ જીતે અને બીજો હારે. પરિણામ જે દર ચૂંટણીમાં આવવાનું હોય એ જ આવે, પણ એકની જીત અને બીજાના પરાજયનાં કારણ એક વત્તા એક એટલે બે એવા સાદા ગણિત પર આધારિત હોતાં નથી.