પીસીઓએસ: સ્ત્રી અને સંતાનપ્રાપ્તિ વચ્ચેનો અવરોધ

લાખો યુવતીઓને પીડતી ‘પોલિસિસ્ટિક ઓવરી સિન્ડ્રોમ’ની વ્યાધિનું એક લક્ષણ છે પિરિયડ્સમાં પ્રોબ્લેમ!

- ડૉ. અર્ચના પારસ શાહ

તમે ઑઈલી સ્કિનથી પરેશાન છો? તમારું માસિક ઘણી વાર મિસ થઈ જાય છે અથવા અનિયમિત રહે છે? તમારું વજન તમે કાબૂમાં રાખવામાં સફળ નથી થતાં?

ઘણી વાર સ્ત્રી આવી તકલીફને નૉર્મલ ગણી એની ઉપેક્ષા કરે છે. આમ પણ આપણાં મોટા ભાગનાં ઘરોમાં સ્ત્રીનું સ્વાસ્થ્ય હંમેશાં અવગણાયેલો રહેતો વિષય છે. સ્ત્રી પોતે પણ પોતાના આરોગ્ય વિશે એટલી સજાગ કે ચિંતિત હોતી નથી. સ્ત્રીના પ્રાયોરિટી લિસ્ટમાં એનો પોતાનો નંબર છેલ્લો જ હોય છે! અહીં આ વાત કરવાનો ઉદ્દેશ એ છે કે લેખની શરૂઆતમાં જેનો ઉલ્લેખ છે એ બધી તકલીફ પોલિસિસ્ટિક ઓવરી સિન્ડ્રોમ (પીસીઓએસ)ને કારણે પણ હોઈ શકે છે. હા, આ એક વ્યાધિ છે અને સરેરાશ દર દસમાંથી એક સ્ત્રી એની પ્રેગ્નન્સી રાખવાની ઉંમરે એનાથી પરેશાન રહેતી હોય છે. તો ચાલો, આજે જાણીએ આ પોલિસિસ્ટિક ઓવરી સિન્ડ્રોમ વિશે.

પોલિસિસ્ટિક ઓવરી સિન્ડ્રોમ એ હોર્મોન્સની અનિયમિતતાને કારણે થતી બીમારી છે, જેનાથી લાખો મહિલાઓ પીડાય છે. આ વ્યાધિ સ્ટેઈન-લેવન્થલ સિન્ડ્રોમ તરીકે પણ ઓળખાય છે.