આ ઈલાજ નથી, પણ આનો બીજો કોઈ ઈલાજ પણ નથી!

જેના માથે એકસોથી વધુ અપરાધ બોલતા હતા એ ઉત્તર પ્રદેશના મહા ભરાડી રાજકારણી અતિક અહેમદની ડઝનબંધ પોલીસ જવાનોની હાજરીમાં હત્યા અને એના લબાડ દીકરાનું એન્કાઉન્ટર આપણા સમાજ માટે સારા સંકેત નથી, પણ મુશ્કેલી એ છે કે રાજકારણમાં ઘૂસેલા આ સડાને નાથવાનો વિકલ્પ છે ખરો?

- હીરેન મહેતા

કાનૂન મર્યાદાની બહાર જઈ ‘પોલીસ એન્કાઉન્ટર’ના નામે કોઈ આરોપીને ઠાર મારવાનું અનુચિત છે, પણ..

આ ગંદી રમત વર્ષોથી ચાલે છે અને વર્ષોથી બધાને એની ખબર પણ છે. કોઈ પણ ભોગે સત્તાને વળગી રહેવાની વાસના આપણા રાજકારણીઓમાં જન્મી છે ત્યારથી રાજકારણમાં તમામ પ્રકારના દુરાચારની શરૂઆત થઈ છે. પોતાનું બળ દેખાડવા રાજકારણીઓએ ગુંડા તત્ત્વોને કાખમાં લીધાં એ પછી તો અપરાધીઓ જ ખુલ્લેઆમ રાજકારણમાં આવી ગયા. બીજા કોઈના હાથા બનીને રહેવું એના કરતાં રાજકારણમાં પણ પોતાનું વર્ચસ્વ કેમ ન જમાવવું?

થયું છે એવું કે હવે લગભગ દરેકેદરેક રાજકીય પક્ષે કેટલાક માથાભારે લોકોને પોતાના સંગઠનમાં માનભેર સ્થાન આપવું પડ્યું છે અને રાજકારણમાં એમની હાજરી સ્વીકારી લેવી પડી છે. અમદાવાદનો અબ્દુલ લતીફ હોય કે મહારાષ્ટ્રનો પપ્પુ કલાની અથવા તો કર્ણાટકના ખાણમાફિયા રેડ્ડી બંધુઓ, આ તમામે કોઈ ને કોઈ રાજકારણીના આશીર્વાદથી એમનો ધંધો વધાર્યો અને પછી પોતે જ રાજકારણમાં ઊતરી આવ્યા. ઉત્તર પ્રદેશ અને બિહારમાં ધંધો ગુંડાગર્દી તો જિલ્લે જિલ્લે આવા રાજકારણી જોવા મળે, જેનો મૂળ હોય. પછી ઊજળા થઈને ફરવાના હેવા ઊપડે એટલે એ અપરાધીઓ રાજકારણમાં આવી જાય.