જિજ્ઞા ગજ્જર: એ ક્રિકેટ રમતી નથી.. ક્રિકેટ જીવે છે!

નાનપણમાં રેડિયો પર એ કૉમેન્ટરી સાંભળતી ત્યારથી ક્રિકેટનું ભૂત એના મગજમાં ધૂણ્યા કરે. મેદાનમાં ઊતરીને કપિલ દેવની જેમ એને બોલિંગ કરવી હતી, પોતાની આદર્શ એવી મહિલા ક્રિકેટર ઝૂલન ગોસ્વામી સાથે એને નૅશનલ લેડીઝ ટીમ વતી બ્લુ જર્સી પહેરીને રમવા ઊતરવું હતું, પણ.. એ શક્ય ન બન્યું. જો કે એનાથી હતાશ થયા વગર અત્યારે એ અમદાવાદનાં ગરીબ ઘરનાં બાળકોને ક્રિકેટ રમતાં અને એ રીતે એમની શિસ્ત-એકાગ્રતા વધારવાનું કામ કરે છે.

- કેતન ત્રિવેદી

અનેક ગરીબ પરિવારનાં બાળકો માટે 래 આશાનું એક કિરણ બનેલી અને એમના માટે પોતાનો સમય-શક્તિ-નાણાં આપીને એમની તાલીમ માટે એકેડેમી ચલાવતી યુવતીની વાત છે આ.

વાત છે અમદાવાદની નિવૃત્ત મહિલા ક્રિકેટર જિજ્ઞા ગજ્જરની. મહિલા ક્રિકેટ મૅચો જોનારા કે એની સાથે સંકળાયેલા લોકો માટે આ નામ અજાણ્યું નથી. એક સમયે ગુજરાત તથા વેસ્ટ ઝોનની ટીમમાં રમીને છેક નૅશનલ ટીમમાં સિલેક્શનના દરવાજા ખટખટાવી ચૂકેલી જિજ્ઞા ગજ્જર અત્યારે સેન્ટ્રલ બોર્ડ ઑફ ક્રિકેટ-અમદાવાદની હેડ કોચ છે એ એની પ્રોફેશનલ ઓળખ છે, પણ એની સામાજિક ઓળખ છે ગરીબ અને ઝૂંપડપટ્ટીનાં બાળકોને વિનામૂલ્યે ક્રિકેટની તાલીમ આપતી ક્રિકેટર તરીકેની.

અત્યાર સુધીમાં એ લગભગ સાઠ કરતાં વધારે બાળકોને ક્રિકેટ રમતાં શિખવાડી ચૂકી છે અને એમાંથી અમુક તો દુલીપ ટ્રૉફી સુધી પણ પહોંચ્યાં છે. મ્યુનિસિપલ સ્કૂલમાં ભણતાં અત્યંત ગરીબ પરિવારનાં બાળકોને તમે અમદાવાદના સાબરમતીચાંદખેડા વિસ્તારમાં આવેલા ખુલ્લા ગ્રાઉન્ડમાં ઉત્સાહ અને ઉમંગથી બોલિંગ, બૅટિંગ, વિકેટકીપિંગની પ્રેક્ટિસ કરતાં જુઓ તો સમજી જવાનું કે એ જિજ્ઞા ગજ્જરની જેન ક્રિક હીરોઝ એકેડેમીના વિદ્યાર્થીઓ છે!

કોણ છે આ મહિલા ક્રિકેટર જિજ્ઞા ગજ્જર?

અમદાવાદના સાબરમતી ડી-કૅબિન તરીકે ઓળખાતા વિસ્તારમાં રહેતાં નીતાબહેન અને નટુભાઈ ગજ્જરની આ દીકરી જિજ્ઞાને આમ તો ક્રિકેટનું ભૂત નાનપણમાં રેડિયો પર એ કૉમેન્ટરી સાંભળતી ત્યારથી જ વળગેલું. એની મમ્મીનેય ક્રિકેટનો શોખ એટલે ઘરમાં રેડિયો પર કૉમેન્ટરી ચાલુ જ હોય. મમ્મીનો શોખ તો કૉમેન્ટરી સાંભળવા પૂરતો જ રહ્યો, પણ આ જિજ્ઞાબહેનનો શોખ પહોંચ્યો મેદાનમાં જઈને બોલિંગ કરવા સુધી! સોસાયટીના છોકરાઓ સાથે રમીને અડોશપડોશનાં ઘરની બારીઓના કાચ પણ તોડ્યા. એક વાર તો મમ્મીએ ગુસ્સે થઈને બૅટ ચૂલામાં સળગાવી દીધું, પણ એનાથી તો જિજ્ઞાના દિલમાં ક્રિકેટર બનવાની આગ વધારે ભભૂકી.