બોલો, ચા પીવા નીકળ્યાં અને દોડવીર બની ગયાં!

પ્રમાણમાં ઘણી મોટી ઉંમરે, એક વાર માત્ર મસ્તી ખાતર એમણે રેસમાં ભાગ લીધો, એમાં જીત્યાં અને લો, ત્યારથી એમને ચાનક ચડી.. પછીનાં દસ વર્ષમાં એ અનેક સ્પર્ધામાં જોડાયાં અને એમાં ઘણા મેડલ પણ મેળવ્યા. હવે એમની મંજિલ છે અમેરિકામાં યોજાનારી ‘આયર્નમૅન વર્લ્ડ ચૅમ્પિયનશિપ’. મળો, આ સ્પર્ધા માટે પસંદ થયેલાં દેશનાં પ્રથમ મહિલાને, જે છે સુરતનાં જાણીતાં તબીબ મીના વાંકાવાલા.

- અરવિંદ ગોંડલિયા

એક ડૉક્ટર મહિલા, જેમને જીવનનાં ૪૨ વર્ષ સુધી સ્પોર્ટ્સ સાથે ન્હાવા-નીચોવવાનો સુદ્ધાં સંબંધ ન હોય અને પછીના દાયકામાં એ ચાર ફુલ અને બે ડઝન જેટલી હાફ મૅરેથોન, બે ટ્રાયેથ્લોન અને એક હાફ તથા એક ફુલ આયર્નમૅન (ચાર કિલોમીટર સ્વિમિંગ, ૧૮૦ કિલોમીટર સાઈકલિંગ અને ૪૨ કિલોમીટર રનિંગ) સ્પર્ધા પૂરી કરે એને શું કહેવું?

દેખીતી રીતે જ આ એક મોટી સિદ્ધિ છે.. અને એમની આ કીર્તિગાથા અહીં અટકતી નથી. હવે આ ડૉક્ટર મૅડમની આયર્નમૅન વર્લ્ડ ચૅમ્પિયનશિપમાં પસંદગી થઈ છે. આ ચૅમ્પિયનશિપમાં પસંદ થનારાં એ દેશનાં પ્રથમ મહિલા છે.

ગુજરાત અત્યારે નવરાત્રિની સાથે નૅશનલ ગેમ્સના રમણે ચડયું છે ત્યારે જાણી ગાયનેકોલૉજિસ્ટ ડૉ. મીના વાંકાવાલા પખવાડિયે અમેરિકામાં યોજાનારી સ્પર્ધા માટે તૈયારી કરી રહ્યાં છે. એ સ્પર્ધા છે આયર્નમૅન ટ્રાયેથ્લોન વર્લ્ડ ચૅમ્પિયનશિપ. આ સ્પર્ધામાં એક જ દિવસમાં ચાર કિલોમીટર સ્વિમિંગ, ૧૮૦ કિલોમીટર સાઈકલિંગ અને ૪૨ કિલોમીટર રનિંગ કરવાનું હોય છે. ડૉ. મીના વાંકાવાલા આ સ્પર્ધા માટે ભારતમાંથી ક્વૉલિફાય થનારાં પ્રથમ મહિલા છે. અગાઉ ફુલ આયર્નમૅન સ્પર્ધા પૂરી કરનારા ખેલાડીઓની જ વર્લ્ડ ચૅમ્પિયનશિપ માટે પસંદગી થતી હોય છે. દુનિયામાં જુદાં જુદાં સ્થળે વર્ષમાં ૧૦૦થી વધુ આયર્નમૅન સ્પર્ધા થતી હોય છે. એમાં પ્રથમ ત્રણ વિજેતાઓને વર્લ્ડ ચૅમ્પિયનશિપ માટે આમંત્રણ મળે છે. મીનાબહેને આ ઓગસ્ટ મહિનામાં કઝાકિસ્તાન ખાતે યોજાયેલી ફુલ આયર્નમૅન ટુર્નામેન્ટમાં ભાગ લીધો હતો અને ૧૪ કલાકમાં ઈવેન્ટ પૂરી કરી ત્રીજું સ્થાન મેળવ્યું હતું, જે બદલ હવે એમને  વર્લ્ડ ચૅમ્પિયનશિપમાં નિમંત્રણ મળ્યું છે.