അനാവശ്യചെലവ് ഒഴിവാക്കണോ എസ്ഐപി സഹായിക്കും

വരുമാനം കിട്ടിത്തുടങ്ങുമ്പോൾ എസ്ഐപി തുടങ്ങുക, ബാക്കികൊണ്ടു ചെലവുകൾ നടത്തുക.

- ബാലചന്ദ്രൻ വിശ്വാറാം ഇൻഷുറൻസ്, മ്യൂച്വൽ ഫണ്ട് അഡ്വൈസർ

നിങ്ങൾക്ക് ഇപ്പോൾ ഒരുപാട് പാഴ് ചിലവ് ഉണ്ടോ, അതു കുറയ്ക്കണം എന്നാഗ്രഹമുണ്ടെങ്കിലും നടക്കുന്നില്ലേ? എളുപ്പത്തിൽ, ഉടനെ ചെയ്യാവുന്ന ഒരു പരിഹാരമുണ്ട്. നല്ലൊരു മ്യൂച്വൽഫണ്ട് കണ്ടെത്തി ഉടനെ ഒരു എസ്ഐപി ചേരുക. ആദ്യത്തെ ഒന്നുരണ്ടു മാസം കുറച്ചു ബുദ്ധിമുട്ടുണ്ടാകും. അതങ്ങു സഹിക്കുക. വരും മാസങ്ങളിൽ ക്രമേണ നിങ്ങളുടെ ചെലവ് നിക്ഷേപം കഴിച്ചുള്ള തുകയിൽ ഒതുക്കാൻ ഇതു പ്രേരിപ്പിക്കും.

വരുമാനം കിട്ടിത്തുടങ്ങുമ്പോൾ തന്നെ ഒരു എസ്ഐപിയിൽ ചേർന്നാൽ ബാക്കി തുകയ്ക്കു മാസച്ചെലവു കൾ കൈകാര്യം ചെയ്യാൻ ശീലിക്കാം. എസ്ഐപി യിൽനിന്ന് നല്ലൊരു റിട്ടേൺ ലഭിക്കാൻ നാലഞ്ചു കൊല്ലം കാത്തിരിക്കേണ്ടി വരാം. പക്ഷേ, അതിനകം നിങ്ങളുടെ അനാവശ്യ ചെലവുകൾ കുറയ്ക്കാൻ പറ്റിയാൽ അതു വലിയ നേട്ടം തന്നെയാകും. മാത്രമല്ല, ഏതാനും വർഷം കഴിയുമ്പോൾ നിങ്ങൾ പോലും അറിയാതെ നല്ലൊരു തുക സമ്പത്തായി വളർത്തിയെടുക്കാനും കഴിയും.