പലിശ കുറയുന്നു നേട്ടമെടുക്കാം നഷ്ടം കുറയ്ക്കാം

ഏറെ നാളുകൾക്കുശേഷം പലിശനിരക്കിലുണ്ടായ കുറവ് ഇനിയും തുടരാനുള്ള സാധ്യത പരിഗണിച്ച് വായ്പയെടുത്തവരും നിക്ഷേപകരും ചെയ്യേണ്ട കാര്യങ്ങൾ.

- അനിൽകുമാർ ശർമ

റിസർവ് ബാങ്ക് റീപ്പോ നിരക്ക് കാൽ ശതമാനം (0.25%) കുറച്ചതോടെ വിവിധ ബാങ്കുകൾ വായ്പാ പലിശ കുറച്ചു തുടങ്ങി. വായ്പകളുടെ പ്രതിമാസ തിരിച്ചടവ് (ഇഎംഐ) കുറയുമെന്നത് ഒട്ടേറെ കുടുംബങ്ങൾക്കു പ്രയോജനപ്പെടും.

നേട്ടം ആർക്കൊക്കെ?

റിസർവ് ബാങ്കിൽനിന്നു ബാങ്കെടുക്കുന്ന വായ്പ യുടെ പലിശയായ റീപ്പോ നിരക്കു കുറച്ചാൽ ബാങ്കിന്റെ പലിശഭാരം കുറയും. ബാങ്കുകൾ ഇത് ഇടപാടുകാർക്കു കൈമാറും. റീപ്പോ കുറവിന് ആനുപാതികമായ ഇളവ് ബാങ്കുകൾ കസ്റ്റമർക്കു നൽകില്ലെങ്കിലും ന്യായമായ ഒരു കുറവു പ്രതീ ക്ഷിക്കാം.

ഫിക്സഡ് പലിശയിൽ വായ്പയെടുത്തവർക്ക് നിരക്കു കുറയില്ല. ഫ്ലോട്ടിങ് റേറ്റിൽ വായ്പയെടുത്തവർക്കും പുതുതായി വായ്പയെടുക്കുന്നവർക്കും പ്രയോജനം ലഭിക്കും. റീപ്പോ മാറുന്നതിനനുസരി ച്ച് പലിശ മാറുന്ന ആർഎൽ എൽആർ (Repo Linked Lending Rate) വായ്പകളിലാണ് ഇളവിന്റെ നേട്ടം ഉടനെ ലഭിക്കുക. ഭവനവായ്പ, വാഹനവായ്പ, വിദ്യാഭ്യാസവായ്പ, വ്യക്തിഗത വായ്പകൾ തുടങ്ങിയവയെല്ലാം പൊതുവേ ഈ വിഭാഗത്തിലായിരിക്കും. എന്നാൽ ബാങ്കിന് ഓരോ മാസവും പരിഷ്കരിക്കാവുന്ന എംസിഎൽആർ (Marginal Cost of Funds Based Lending Rate) വായ്പയാണെങ്കിൽ ബാങ്ക് നിരക്ക് മാറ്റിയാലേ നിങ്ങളുടെ പലിശ കുറയൂ. ചില ബാങ്കുകളിൽ ഗോൾഡ് ലോൺ, ജിഎസ്ടി ലോൺ തുടങ്ങിയവ ഈ വിഭാഗത്തിലാണ്.

എത്ര കുറയും പലിശഭാരം?