പുതിയ കാർ പണം ലാഭിക്കാൻ ചില പൊടിക്കൈകൾ

വാഹനവിലയിൽ കമ്പനികൾ നൽകുന്ന ഡിസ്കൗണ്ട്, സബ്വെൻഷൻ എന്ന പേരിൽ വായ്പാ സ്ഥാപനങ്ങൾ വാങ്ങിയെടുക്കാറുണ്ട്.

- സി.എസ്.രഞ്ജിത്ത് പ്രമുഖ കോളമിസ്റ്റും വേൾഡ് ബാങ്ക് കൺസൽറ്റന്റുമാണ് ലേഖകൻ.

കേരളത്തിൽ കാറു വാങ്ങുന്നവരുടെ എണ്ണം കുതിച്ചുയരുകയാണ്. ഓടിക്കാൻ റോഡുണ്ടോ, പാർക്കുചെയ്യാൻ പോർച്ചുണ്ടോ എന്നൊന്നും നോക്കാതെ മെട്രോ നഗരങ്ങളിലെപ്പോലെ പാതയോരത്തു പാർക്കുചെയ്യുന്ന കാറുകളുടെ എണ്ണവും കൂടിവരുന്നുണ്ട്. വാങ്ങുന്ന കാറുകളിൽ ഓട്ടമാറ്റിക്, ഇലക്ട്രിക്, ഹൈബ്രിഡ് എന്നിങ്ങനെ പുത്ത ൻ സാങ്കേതികവിദ്യ ഉൾപ്പെടെ മോഡലുകളുടെ ഗുണ ഗണങ്ങളെക്കുറിച്ച് ഏവരും ഏറെ വാചാലരാകാറുണ്ട്. പക്ഷേ, സാമ്പത്തികനഷ്ടം വരുത്തുന്ന കാര്യങ്ങൾ പലരും വിസ്മരിക്കുകയാണു പതിവ്. കാർ ഏതുമാകട്ടെ, വാങ്ങാൻ പോകുമ്പോൾ സാമ്പത്തിക ചോർച്ച പരമാവധി തടയാൻ ചില പൊടിക്കൈക ളിതാ:

1. ചോദിച്ചാൽ മാത്രം ഡിസ്കൗണ്ട്

ബോംബെപോലുള്ള മെട്രോനഗരങ്ങളിലെ പ്രാദേശിക പത്രത്താളുകളിൽ എല്ലാ ബ്രാൻഡ് കാറുകളുടെയും വിവിധ തരങ്ങൾക്കു ലഭ്യമാകുന്ന ഡിസ്കൗണ്ട് തുകയെക്കുറിച്ചു തുടരെ പരസ്യങ്ങൾ കാണാം. കേരളത്തിൽ ഡിസ്കൗണ്ടുകൾക്ക് അത്ര വലിയ ഊന്നൽ നൽകാതെയാണ് കാറുകളുടെ പരസ്യങ്ങൾ, പക്ഷേ, വിപണിയിലെ മത്സരം കടുക്കുന്നതിനനുസരിച്ച് കമ്പനികളും കാർവിതരണ സ്ഥാപനങ്ങളും വിലപേശുന്നവർക്കു നല്ല ഡിസ്കൗണ്ട് അനുവദിക്കുന്നുണ്ട്. മോഡൽ മാറുമ്പോൾ, സാമ്പത്തികവർഷത്തിന്റെ അവസാനം, ഉത്സവ സീസണുകൾ എന്നിവയൊക്കെ ഡിസ്കൗണ്ട് വാങ്ങിയെടുക്കാൻ പറ്റുന്ന അവസരങ്ങളാണ്. കമ്പനികൾ തമ്മിൽ മാത്രമല്ല, വിതരണക്കാർ തമ്മിലും വ്യത്യസ്ത തട്ടുകളിൽ ജോലി ചെയ്യുന്ന ഉദ്യോഗസ്ഥർ തമ്മിലും കാർ വിൽപനയ്ക്ക് കടുത്ത മത്സരമുണ്ടെന്നു മനസ്സിലാക്കാതെ പോകരുത്. ഇതൊന്നുമറിയാതെ വന്നുപെടുന്ന നിർദോഷികളായ വാങ്ങലുകാർക്ക് അർഹമായതും അനുവദനീയമായതുമായ ഡിസ്കൗണ്ട് തുക പല പോക്കറ്റുകളിലായി വീതംവച്ചുപോകും. അതിനാൽ നന്നായി വിലപേശി പരമാവധി ഡിസ്കൗണ്ട് ഉറപ്പാക്കുക.

2. പോക്കറ്റ് കീറും ആക്സസറീസ്