ആരോഗ്യ ഇൻഷുറൻസ് തലവേദന ഉണ്ടാക്കുന്നതിന്റെ കാരണങ്ങൾ

പോളിസിയുടമകളുടെ അറിവില്ലായ്മയും തെറ്റായ രീതികളുംമൂലം ക്ലെയിം നിഷേധിപ്പെടാവുന്ന സാഹചര്യങ്ങൾ തിരിച്ചറിയണം.

- വിശ്വനാഥൻ ഒടാട്ട് എയിംസ് ഇൻഷുറൻസ് ബ്രോക്കിങ് [e-mail]

കഴിഞ്ഞ രണ്ടു വർഷമായി ഞാൻ നല്ലൊരു തുക പ്രീമിയം അടയ്ക്കുന്നു. പക്ഷേ, ഈയിടെ ചികിത്സാച്ചെലവുകൾ ക്ലെയിം ചെയ്തപ്പോൾ അവരതു പൂർണമായും നിരസിച്ചു. ഈ ഹെൽത്ത് ഇൻഷുറൻസ്പോലെ തട്ടിപ്പ് മറ്റൊന്നില്ല. വെറുതെ പ്രീമിയം തുക അടയ്ക്കാമെന്നു മാത്രം. ആർക്കും അവർ ക്ലെയിം നൽകില്ല. ഓംബുഡ്സ്മാനും കോടതിയും ഒക്കെ അവരുടെ കൂടെയേ നിൽക്കൂ. 'ഇത്തരത്തിൽ പറയേണ്ട അനുഭവം നിങ്ങൾക്കുമുണ്ടായിട്ടുണ്ടാകും. അല്ലെങ്കിൽ പലരും ഇത്തരത്തിൽ നിങ്ങളോടു പറഞ്ഞിട്ടുണ്ടാകാം. കാരണം ഇതിപ്പോൾ സർവ സാധാരണയായി കേൾക്കുന്ന കാര്യമാണ്. ചികിത്സാച്ചെലവ് കുതിച്ചുയരുന്നതിനാൽ ഇപ്പോൾ ഏവരും ഉറ്റുനോക്കുന്നത് ആരോഗ്യ ഇൻഷുറൻസ് പോളിസികളെയാണ്. പക്ഷേ, പോളിസി എടുത്താലും ഭൂരിപക്ഷം പേർക്കും ആവശ്യമായ സേവനം ശരിയായ സമയത്തു ലഭിക്കുന്നില്ല എന്നത് യാഥാർഥ്യമാണ്. പോളിസി എടുക്കുന്നവരുടെ അറിവില്ലായ്മയും കാര്യങ്ങൾ കൃത്യമായി മനസ്സിലാക്കാൻ ശ്രമിക്കാത്തതുമാണ് ഇതിനു വലിയൊരളവോളം കാരണം. ഒപ്പം ഇൻഷുറൻസ് കമ്പനികളുടെയും ആശുപത്രികളുടെയും തെറ്റായ രീതികൾ മൂലവും പോളിസിയുടമകൾക്കു ക്ലെയിം വലിയതോതിൽ നിഷേധിക്കപ്പെടുന്നു. പോളിസിയുടമകളുടെ അറിവില്ലായ്മയും തെറ്റായ രീതികളും മൂലം ക്ലെയിം നിഷേധിപ്പെടാവുന്ന സാഹചര്യങ്ങൾ ആദ്യം അറിയാം:

1. രോഗമില്ലാത്തപ്പോൾ എന്തിന് പോളിസി

ഒരു വ്യക്തിയോട് പോളിസി എടുക്കുന്നില്ലേ എന്നു ചോദിച്ചാൽ എനിക്കും കുടുംബത്തിലെല്ലാവർക്കും നല്ല ആരോഗ്യമുണ്ട്. പിന്നെ എന്തിനാ ഇപ്പോഴേ പ്രീമിയത്തിനായി പണം നഷ്ടപ്പെടുത്തുന്നത് എന്ന മറുചോദ്യമാകും പൊതുവേ ലഭിക്കുക.

എന്നാൽ കുടുംബത്തിൽ ആർക്കെങ്കിലും ഒരു മാരകരോഗത്തിന്റെ ലക്ഷണം കണ്ടാലോ? പിന്നെ നെട്ടോട്ടമായി. അസുഖവിവരങ്ങൾ മറച്ചുവച്ച് പോളിസിയെടുക്കും. പ്രപ്പോസൽ ഫോമിലെ ചോദ്യങ്ങൾക്ക് തെറ്റായ മറുപടികളാകും നൽകുക.