കുട്ടികൾ വീഴുന്ന ഡിജിറ്റൽ കെണികൾ

സൈബർ ക്രൈം

- ഇ. എസ്. ബിജുമോൻ സൈബർ ഫൊറൻസിക് ആൻഡ് ഇൻവെസ്റ്റിഗേറ്റിങ് എക്സ്പെർട്ട്

ഡിജിറ്റൽ ലോകത്തിന്റെ വളർച്ച ഏറ്റവും കൂടുതൽ സ്വാധീനിച്ചിരിക്കുന്നത് കുട്ടികളെയാണ്. പഠനം, ഉല്ലാസം എന്നിവയ്ക്കെല്ലാം കുട്ടികൾ ഓൺലൈൻ പ്ലാറ്റ്ഫോമുകളെ ആശ്രയിക്കുന്നു. എന്നാൽ, ഈ സൈബർ ലോകം പലപ്പോഴും കുട്ടികളെ പ്രതികൂലമായും ബാധിക്കുന്നുണ്ട്. സൈബർ ലോകത്ത് നേരിടേണ്ടിവരുന്ന പ്രശ്നങ്ങൾ കുട്ടി കൾ വേഗം മനസ്സിലാക്കണമെന്നില്ല. അതു കൊണ്ട് മാതാപിതാക്കളും മുതിർന്നവരും വേണം ഇക്കാര്യത്തിൽ ശ്രദ്ധിക്കാൻ.

ചൂഷണം ചെയ്യപ്പെടുമ്പോൾ

ഓൺലൈൻ പ്ലാറ്റ്ഫോമുകളിലൂടെ സൗഹൃദം സ്ഥാപിച്ച് കുട്ടികളെ തട്ടിപ്പിന് ഇരയാക്കുന്ന കേസുകൾ ധാരാളം റിപ്പോർട്ട് ചെയ്യുന്നുണ്ട്. സോഷ്യൽ മീഡിയയിലൂടെയോ ഓൺലൈൻ ഗെയിമുകൾ വഴിയോ അപരിചിതർ കുട്ടികളുമായി സൗഹൃദത്തിലാകുന്നു. പിന്നീട് സ്വകാര്യ വിവരങ്ങൾ അടക്കം ചോർത്തുന്നു. ഇത് ചിലപ്പോൾ സാമ്പത്തിക തട്ടിപ്പുകളിലേക്കുവരെ കൊണ്ടെത്തിക്കും.

അപരിചിതരുമായി സൗഹൃദം സ്ഥാപിക്കുമ്പോൾ ശ്രദ്ധിക്കേണ്ട കാര്യങ്ങൾ കുട്ടികളെ പറഞ്ഞു മനസ്സിലാക്കുക. എത്ര സൗഹൃദത്തിൽ എത്തിയാലും സ്വകാര്യ വിവരങ്ങൾ പങ്കുവയ്ക്കരുതെന്ന് പഠിപ്പിക്കുക. ഓൺ ലൈൻ പ്ലാറ്റ്ഫോമുകളിലൂടെയുള്ള സൗഹൃദങ്ങൾ ഏതൊക്കെ തരത്തിൽ അപകടകരമാകാൻ സാധ്യതയുണ്ടെന്ന് കുട്ടികളെ ബോധവൽക്കരിക്കുക.