பட்டமளிப்பு விழா அப்பதான் முதல் படத்துக்கான ஆடிஷன்ல கலந்துகிட்டேன்!

சைத்ரா பொறுப்பான குடும்பத் தலைவியாக, காதலியாக பக்குவப்பட்ட நடிப்பை சமீபத்தில் வெளியான '3BHK’ படத்தில் காண்பித்து அனைவரின் பாராட்டையும் பெற்றவர்.

- எஸ்.ராஜா

பெங்களூர்வாசியான இவருக்கு அறிமுகமான முதல் தமிழ் படத்திலேயே சரத்குமார், தேவயானி, சித்தார்த் போன்ற ஆளுமைகளுடன் நடிக்கும் வாய்ப்பு கிடைத்ததில் சந்தோஷத்தில் பூரிப்படைந்துள்ளார். சுட்டெரிக்கும் மதிய வேளையில் சைத்ராவிடம் பேசினோம். கன்னடத்தை தாய்மொழியாகக் கொண்டவரிடம் தமிழ் விளையாடியது.

யார் இந்த ‘சைத்ரா'?

பிறந்தது, வளர்ந்தது எல்லாமே பெங்களூர்ல. படிச்சது பயோடெக் இன்ஜினியரிங். சரியா ஞாபகமிருக்கு. என்னுடைய பட்டமளிப்பு விழா நடக்கும்போது முதல் படத்துக்கான ஆடிஷன்ல கலந்துக்கிட்டேன்.

2019ல் என்னுடைய முதல் படம் ‘மகீரா' ரிலீஸாச்சு. ‘பரவாயில்லையே, சைத்ரா நல்லா நடிக்கிறாங்க' என்ற பேச்சு மெல்லப் பரவி அடுத்தடுத்த படங்கள் கிடைக்க உதவுச்சு. '3BHK' என்னுடைய 10வது படம்.

நீங்க நல்லா பாடுவீங்கன்னு சொல்றாங்களே?

மியூசிக் என்னுடைய ப்ரொஃபஷன் கிடையாது. ஆனால், சின்ன வயசுலேயே கர்நாடக சங்கீதம் கத்துக்கிட்டேன். ஆக்டிங் என்னுடைய ப்ரொஃபஷனா இருந்தாலும் மியூசிக் எனக்கு பிடிக்கும்.

'கருடா காமன விருஷ்பா வாஹனா' என்ற கன்னடப் படத்துக்காக முதல்முறையாக பாடினேன். அந்தப் பாடல் சூப்பர் ஹிட் என்பதோடு அந்த ஆண்டின் சிறந்த பாடகிக்கான 'சைமா' அவார்டும் கிடைச்சது. தொடர்ந்து பல படங்களில் பாடும் வாய்ப்பு வந்துச்சு. அந்த வகையில் நடிப்போடு சேர்ந்து பாடவும் வாய்ப்பு கிடைச்சா சந்தோஷப்படுவேன்.

தமிழில் பாடுவீர்களா?

யாருக்குதான் அந்த ஆசை இருக்காது?! எனக்கு தமிழ்ப் பாடல்கள் ரொம்ப பிடிக்கும். இளையராஜா, ஏ.ஆர்.ரஹ்மான் என்னுடைய ஃபேவரைட் மியூசிக் டைரக்டர்ஸ். தமிழில் பாடும் வாய்ப்பு என்பது பக்தனை கடவுள் கோயிலுக்கு அழைப்பது போல் அற்புதமான தருணம்

'3BHK' வாய்ப்பு எப்படி கிடைச்சது?

சமீபத்துல ரக்ஷித் ஷெட்டி நடிச்ச ‘சப்த சாகரடச்சே எல்லோ' என்ற கன்னட படம் பண்ணினேன். அது பெரிய ஹிட். அந்தப் படம் பல மொழிகளில் வெளிவந்துச்சு. கன்னட சினிமாவையும் தாண்டி அது எனக்கு நல்ல பேர் வாங்கிக் கொடுத்துச்சு.