ആനി മസ്ക്രീന്റെ വീട്ടിലെ മോഷണവും പൊലീസിന്റെ മാനനഷ്ടവും

രേഖാമൂലം

-  ശ്രീകുമാർ ശേഖർ

തിരുവിതാംകൂർ ചീഫ് സെക്രട്ടറി എം കെ നീലകണ്ഠ അയ്യർ ദിവാൻ സി പി രാമസ്വാമി അയ്യർക്ക് ബോംബെയിലെ താജ് ഹോട്ടലിലേക്ക് 1938 നവംബർ 11ന് അയച്ച ടെലഗ്രാമിൽ നാലു വാക്കുകളേ ഉണ്ടായിരുന്നുള്ളൂ: "Mascarene arrested Chengannur Yesterday' (മസ്ക്രീനെ ചെങ്ങന്നൂരിൽ ഇന്നലെ അറസ്റ്റ് ചെയ്തു) എന്നുമാത്രം. സർ സി പി ഈ സന്ദേശം പ്രതീക്ഷിച്ചിരിക്കുകയായിരുന്നു. എട്ടു മാസം മുമ്പ് 1938 ഫെബ്രുവരി 23ന് രൂപീകരിച്ച തിരുവിതാംകൂർ സ്റ്റേറ്റ് കോൺഗ്രസിന്റെ ആദ്യ വർക്കിങ് കമ്മിറ്റിയിലെ ഏക വനിതാ അംഗമായിരുന്ന ആനി മസ്ക്രീനെ അറസ്റ്റ് ചെയ്യാൻ ഉത്തരവിട്ടിട്ടാണ് സി പി ബോംബെയ്ക്ക് പോയത്.

വിചിത്രമായിരുന്നു അറസ്റ്റിന് ഇടയാക്കിയ കേസ്. സ്റ്റേറ്റ് കോൺഗ്രസിനെ നേരിടാൻ ഭയപ്പെടുത്തലായിരുന്നു സി പിയുടെ ആദ്യ മാർഗം. അതിന് പൊലീസുകാരെയും അവരുടെ നിയന്ത്രണത്തിലുള്ള സാമൂഹ്യവിരുദ്ധരെയും ഉപയോഗിച്ചു. ആനി മസ്ക്രീൻ ആദ്യമേ നോട്ട പുള്ളിയായി. തീപാറുന്നതായിരു ന്നു അവരുടെ വാക്കുകൾ. ചില പ്രസംഗങ്ങൾ നാഷണൽ ആർക്കൈവ്സിലുണ്ട്.