വരകളുടെ നീതിശാസ്ത്രം

നിരത്തിന്റെ ഭാഷയായ റോഡ് മാർക്കിങ്ങുകളെക്കുറിച്ച്...

- ദിലീപ് കുമാർ കെ.ജി. മോട്ടർ വെഹിക്കിൾസ് ഇൻസ്പെക്ടർ സബ് ആർ.ടി. ഓഫിസ് പെരുമ്പാവൂർ.

അടുത്തിടെ ഒരു നഗരത്തിൽ വാഹനം നിർത്താൻ അനുമതിയില്ലാത്ത ജംക്ഷനിൽ വരയ്ക്കേണ്ട മഞ്ഞനിറത്തിലുള്ള ബോക്സ് മാർക്കിങ്ങിനു പകരം വരച്ചത് വെള്ളനിറത്തിൽ. കരാറെടുത്ത പണിക്കാരനെന്ത് കളർ കോഡ്? പരാതിയായി, വാർത്തയായി, കുറച്ചു ദിവസങ്ങൾ ക്കുശേഷം വെള്ളയുടെ മുകളിൽ മഞ്ഞ പെയിന്റ് അടിച്ചു. പക്ഷേ, അതിനെക്കുറിച്ച് ധാരണയില്ലാത്തവർ മുൻപും ഇപ്പോഴും ബോക്സിനു മുകളിൽ വാഹനം നിർത്തുന്നു. ഇപ്പോൾ ഉയർന്നുവന്നിട്ടുള്ള ആവശ്യം വാഹനം നിർത്താൻ പാടില്ലാത്ത സ്ഥലമാണ് എന്ന ബോർഡ് സ്ഥാപിക്കണമെന്നതാണ്. ഒരു റോഡ് സൈൻ എന്താണെന്ന് എഴുതിവയ്ക്കേണ്ടി വരുന്നത് എത്ര ദയനീയമാണ്. വെടിവച്ചാൽ മാത്രം പോരാ ഠോ എന്നുകൂടി പറയേണ്ടി വരുന്ന അവസ്ഥ.

ലെയ്ൻ ട്രാഫിക്കും ഗതാഗതക്കുരുക്കും

കേരളത്തിലെ ട്രാഫിക് ബ്ലോക്കുകളിൽ അധികവും സൃഷ്ടിക്കുന്നത് വരി തെറ്റിച്ച് കയറിവരുന്ന വാഹനങ്ങളാണ്. വരി തെറ്റിച്ച് പോകുന്നവരെ കാണുമ്പോൾ അതുവരെ ക്ഷമയോടെ കാത്തുകിടന്നവരിൽ പൊടുന്നനെ അസ്വസ്ഥത രൂപം കൊള്ളുകയായി.

ട്രാഫിക് ജംക്ഷനുകളിൽ മുഖാമുഖം കാണുന്ന രീതിയിൽ എതിർദിശയിലെ ഡ്രൈവർമാരെക്കാൾ അസ്വസ്ഥത ക്യൂവിന്റെ പിന്നിലുള്ള ഡവർക്കുണ്ടാകും. ട്രാഫിക് സിഗ്നൽ പച്ച തെളിയുമ്പോൾ ആദ്യം കിടക്കുന്ന വാഹനം സ്റ്റാർട്ടാക്കാൻ ഒരു സെക്കൻഡ് താമസിച്ചാൽ പുറകിലു ള്ളവർ ഹോണടിച്ച് അസ്വസ്ഥത പ്രകടിപ്പിക്കും.