అభయ కల్పతరువు

అభయ కల్పతరువు

నూతన సంవత్సరం!... అంటే కొత్త సంకల్పాలు, కొత్త లక్ష్యాలు, కొత్త ప్రణాళికలు! సంవత్సరమంతా తమకు కలిసిరావాలని కోరుతూ దేవునికి మొక్కులు, ప్రదక్షిణలు, పూజలు! వీటిలో ఎన్ని సంకల్పాలు సిద్ధిస్తాయో, ఎన్ని లక్ష్యాలు నెరవేరుతాయో, ఎన్ని పూజలు ఫలిస్తాయో లోగుట్టు పెరుమాళ్ళకెరుక! ఇలా ప్రపంచమంతా భవిష్యత్తుపై ఆశతో నడుస్తోంది... కాదు, పరుగెడుతోంది.'ఈ గండం గట్టెక్కితే రేపటికి అన్నీ చక్కబడతాయి, ఈ సమస్య తీరిపోతే భవిష్యత్తుకు ధోకా ఉండదు'... ఇలా ప్రతి ఒక్కరికీ 'తరువాత'పై ఆశ! ఈ ఆశే జీవితాన్ని నడుపుతున్న ఇంధనం. ఆ తరువాతే ధనం! అసలు ఈ ఆకు కారణం కోరిక. కోరికకు మూలం రజోగుణం. రజోగుణానికి మూలం...

‘ఆఁ ఆఁ... ఆగండి, ఆగండి! నూతన సంవత్సరం అని మొదలు పెట్టారు, బాగానే ఉంది. మీరు అసలు ఏం చెప్పదలచుకున్నారు? కోరికలు ఉండకూడదంటారా? కోరుకోవడం తప్పంటారా?' అంటే... కోరికలూ తప్పు కాదు, కోరుకోవడమూ తప్పు కాదు. కానీ, చాలామందికి ఏం కోరుకోవాలో తెలియదు. రాజుగారిని కొబ్బరిచిప్పలు అర్థించినట్లు, జనులు ఏమాత్రం బుద్ధి ఉపయోగించకుండా భగవంతుణ్ణి ఏవేవో కోరుతూంటారు. భగవంతుడు కూడా చిన్నచిన్న వాటిని నెరవేర్చి, అసలైన వాటిని మరపింపజేస్తాడు.