കുടുംബിനികളെ പലിശയിൽ കുരുക്കി കുടുംബശ്രീ

കുടുംബശ്രീയുടെ 25 വർഷവുമായി ബന്ധപ്പെട്ട് ആഴ്ചപ്പതിപ്പ് (ലക്കം 1319) പ്രസിദ്ധീകരിച്ച ലേഖനങ്ങളോടുള്ള പ്രതികരണം.

- അബ്ദുൾ ലത്തീഫ് മാറഞ്ചേരി

കേരളത്തിൽ 25 വർഷം പൂർത്തീകരിച്ച് കുടുംബശ്രീ, അതിന്റെ സംഘാടനംകൊണ്ടും സ്ത്രീ ശാക്തീകരണംകൊണ്ടും സവിശേഷമായ സ്ഥാനം നേടിയിട്ടുണ്ട്. സ്ത്രീകളിലെ സമ്പാദ്യശീലം വളർത്തി അവരെ സ്വയം പര്യാപ്തതയിലേക്ക് കൈപിടിച്ച് ഉയർത്താൻ കുടുംബശ്രീ പ്രവർത്തനങ്ങൾക്ക് കഴിഞ്ഞിട്ടുണ്ട്. സാമൂഹിക-രാഷ്ട്രീയ അവബോധം സ്ത്രീകളിൽ വളർത്തുന്നതിനും കുടുംബശ്രീ കാരണമായിട്ടുണ്ട്. കുടുംബശ്രീയുടെ ഇത്തരം പോസിറ്റിവുകളാണ് അക്കാദമിക് തലത്തിലുള്ളവരും അതിനെ പ്രമോട്ട് ചെയ്യുന്ന രാഷ്ട്രീയക്കാരും ഉയർത്തിപ്പിടിച്ച ലേഖനങ്ങളും ഫീച്ചറുകളും തയാറാക്കിക്കൊണ്ടിരിക്കുന്നത്.

അതിന്റെ ഈ ഗുണവശങ്ങളെല്ലാം അംഗീകരിക്കുന്നതോടൊപ്പം ഇതിന്റെ ഒരു മറുവശം നാം കാണാതെ പോകരുത്. യഥാർഥത്തിൽ കുടുംബ ശ്രീ വഴി സ്ത്രീകൾക്കഭിച്ചുകൊണ്ടിരിക്കുന്ന ഈ കൊട്ടിഗ്ഘോഷിക്കപ്പെടുന്ന നേട്ടങ്ങൾക്ക് അപ്പുറം വലിയൊരു ചൂഷണവും ചതിയും ഒളിഞ്ഞിരിക്കുന്നത് നാം മനസ്സിലാക്കേണ്ടതുണ്ട്. ഇവർ ആഴ്ചതോറും ശേഖരിക്കുന്ന ത്രിഫ്റ്റ് (സമ്പാദ്യം) ഓരോ അയൽക്കൂട്ടങ്ങളുടെ പേരിലും ബാങ്കിൽ നിക്ഷേപിച്ചുകൊണ്ടിരിക്കുന്നു. ഈ ത്രിഫ്റ്റിൽ നിന്ന് ഇവർ പരസ്പരം വായ്പ കൊടുക്കുന്നവരും ഉണ്ട്. ഇവർ ബാങ്കിൽ അടക്കുന്ന ത്രിഫ്റ്റിന്റെ അടിസ്ഥാനത്തിൽ ഗ്രൂപ്പിലെ രണ്ടിൽ കൂടുതൽ അംഗങ്ങൾക്ക് കുടുംബശ്രീയുടെ സി.ഡി.എസിന്റെ ശിപാർശപ്രകാരം ബാങ്ക് ലിങ്ക്ഡ് വായ്പകൾ അനുവദിക്കാറുണ്ട്. 3 ലക്ഷം വരെ 4 ശതമാനം പലിശ മാത്രം ഇവർ നൽകിയാൽ മതി. ബാക്കി ബാങ്കിന്റെ പലിശ കുടുംബശ്രീ ജില്ല മിഷൻ സബ്സിഡിയായി ബാങ്കിന് നൽകും. അടവിൽ വീഴ്ച വരുത്തിയാൽ ഈ സബ്സിഡി ലഭിക്കില്ല. അപ്പോൾ മുഴുവൻ പലിശയും വായ്പ എടുത്തവർ അടക്കേണ്ടിവരും.