વિઝા વિમર્શ

વાગ્દ્ત્તાના વિઝા

- ડો.સુધીર શાહ

‘સર, મારો દીકરો એક અમેરિકન સિટીઝનના પ્રેમમાં છે. મારો દીકરો એક ટૂરમાં મિત્રો જોડે દુબઈ ફરવા ગયો હતો. પેલી અમેરિકન સિટીઝન યુવતી પણ એની બહેનપણીઓ જોડે દુબઈ ફરવા આવી હતી. એક બપોરના મારો દીકરો અને પેલી છોકરી, જુદા-જુદા ડેઝર્ટ સફારીમાં ગયાં હતાં. રેતીના ડુંગરા ઉપરથી એ છોકરીની કાર ઊથલી પડી હતી. મારા દીકરાએ એની કાર થોભાવીને એ છોકરીને પકડીને ઊભી કરી હતી. એ પછી બાકીના જે ચાર-પાંચ દિવસ એ બંને દુબઈમાં રહ્યાં ત્યારે સાથે જ ફર્યાં. એમણે એકબીજાનો સંપર્ક ચાલુ રાખ્યો. રોજ રાત્રિના એક-એક બબ્બે કલાક તેઓ વૉટ્સઍપ ઉપર એકબીજાંને જોતાં જોતાં અલકમલ કની વાતો કરતાં. જાહેર હતું કે તેઓ એકબીજાંના પ્રેમમાં હતાં. હવે તેઓ લગ્ન કરવા ઇચ્છે છે. મને વાંધો નથી. એ છોકરી ભારતીય છે, એનો જન્મ અમેરિકામાં થયો હતો એટલે એ અમેરિકન સિટીઝન છે. વર્ષો પહેલાં એનાં માતા-પિતા અમેરિકામાં સ્થાયી થયાં હતાં. અમારી જેમ એ પણ હિન્દુ છે. છોકરીનાં મા-બાપે પણ લગ્નની મંજૂરી આપી છે, પણ એમનો આગ્રહ છે કે લગ્ન અમેરિકામાં જ કરવાં. તેઓ કહે છે કે છેલ્લાં ત્રીસ વર્ષથી તેઓ અમેરિકામાં રહે છે. એમનાં ત્રણ ભાઈઓ અને બે બહેનો એમના કુટુંબ જોડે અમેરિકામાં જ રહે છે. અન્ય સગાંવહાલાં અને મિત્રો પણ અમેરિકામાં છે. અમેરિકામાં એમનો બહોળો વ્યાપાર છે. આથી તેઓ આગ્રહ સેવે છે કે એમની એકની એક દીકરીનાં લગ્ન અમેરિકામાં જ કરવાં.' ઇમિગ્રેશનના કાયદાના મુકુંદભાઈએ જાણકાર ઍડ્વોકેટને એમના દીકરાનાં લગ્ન વિષેની વાત લંબાણપૂર્વક જણાવી.