മുന്നേറാം, മെല്ലെ മെല്ലെ...

സമ്പത്തു കാലത്തു നടുന്ന തൈകളാണു നിക്ഷേപങ്ങൾ. വരുമാനം എങ്ങനെ സുരക്ഷിതമായ നിക്ഷേപമാക്കാം എന്നു ചിന്തിക്കുന്നവർക്ക് മാർഗനിർദേശങ്ങൾ നൽകുന്ന പംക്തി...

- നിഖിൽ ഗോപാലകൃഷ്ണൻ സിഇഒ, പെന്റാഡ് സെക്യൂരിറ്റീസ്

ഒരു വ്യക്തിയെ സംബന്ധിച്ച് ആദ്യ ശമ്പളം വരുമാനം എന്നതിനേക്കാളുപരി സുരക്ഷിതമായ ഭാവിയിലേക്കുള്ള ചുവടുവയ്പ്പു കൂടിയാണ്. പണം സമ്പാദിച്ചിട്ട് നിക്ഷേപിക്കാം എന്ന ചിന്ത മാറ്റി, ചെറിയ തുകയാണങ്കിലും ഉടൻ തന്നെ നിക്ഷേപം ആരംഭിക്കാം എന്നു തീരുമാനിക്കുകയാണു വേണ്ടത്.

സമ്പാദ്യത്തിലേക്കൊരു ഫോർമുല

"വരുമാനം - ചെലവ് സമ്പാദ്യം' എന്നതാണു പൊതുവിൽ കണ്ടുവരുന്ന ഫോർമുല. എന്നാൽ ഇതൊന്നു മാറ്റി എഴുതിയാൽ വലിയ നേട്ടങ്ങൾ കൊയ്യാം. അതിനായി "വരുമാനം - സമ്പാദ്യവും നിക്ഷേപവും - ചെലവ്' എന്ന രീതി ശീലിക്കാം. എല്ലാ ചെലവും ശമ്പളത്തിനുള്ളിൽ നിർത്തുന്നതിനൊപ്പം ഇരുപതു ശതമാനം സമ്പാദ്യത്തിലേക്കു നീക്കിവെക്കാം. എമർജൻസി ഫണ്ട് രൂപീകരണവും ദീർഘകാല നിക്ഷേപവുമാണ് ഈ തുക കൊണ്ടു ലക്ഷ്യം വയ്ക്കുന്നത്. മാസച്ചെലവ് മനസ്സിലാക്കിയശേഷം അതിന്റെ ആറിരട്ടി കരുതൽ നിധിയായി സൂക്ഷിക്കുന്നതാണ് എമർജൻസി ഫണ്ട്.