ഓർമശക്തിയിൽ ഗിന്നസ് അജി

ഗിന്നസ് വേൾഡ് റെക്കോഡ്, ഇന്ത്യ ബുക്ക് ഓഫ് റെക്കോഡ്, അറേബ്യൻ അവാർഡ്, കലാം അവാർഡ് - ഐ ക്യൂ മാൻ ഓഫ് കേരള എന്നാണ് അജി അറിയപ്പെടുന്നത്

- ബൈജു ഗോവിന്ദ്

നാൽപ്പത്തെട്ട് അക്കങ്ങൾ കൊണ്ട് പാക്കിസ്ഥാൻകാരന്റെ ഗിന്നസ് റെക്കോഡ് മറികടന്ന മലയാളിയാണ് അജി. അത്യപൂർവമായ ഓർമശക്തിയാണ് ഈ മുപ്പത്തേഴുകാരനെ ലോകത്തിലൊരാൾക്കു മാത്രം ലഭിക്കുന്ന പുരസ്കാരത്തിലേക്ക് എത്തിച്ചത്. എത്ര വലിയ സംഖ്യ ആയിക്കൊള്ളട്ടെ, നാലു സെക്കൻഡ് കൺമുന്നിൽ കിട്ടിയാൽ മതി. അടുത്ത നിമിഷം നിരയും ക്രമവും തെറ്റാതെ അജി അതെല്ലാം ഓർത്തെടുത്തു പറയും. പരിശീലനത്തിലൂടെ നേടിയെടുത്ത കണക്കിന്റെ തിരുന്തത്തിന് അറേബ്യൻ വേൾഡ് റെക്കോഡാണ് ആദ്യം കിട്ടിയത്. ഈ അവാർഡ് വാങ്ങാൻ ദുബായിയിലേക്കുള്ള വിമാനത്തിൽ കയറിയ സമയത്താണു ഗിന്നസ് റെക്കോഡ് പ്രഖ്യാപിക്കപ്പെട്ടു. വിവരം അറിഞ്ഞ് പൈലറ്റും എയർ ക്രൂവും ചേർ ന്നു നൽകിയ അഭിനന്ദനമാണ് കൊല്ലം കുണ്ടറ സ്വദേശി അജിക്ക് ബഹുജനസമക്ഷം കിട്ടിയ ആദ്യത്തെ അംഗീകാരം.

ക്ലോക്ക് നോക്കാതെ സമയം പറയുക, ഒരാളെ നോക്കി അയാളുടെ ശരീരഭാരം പ്രവചിക്കുക, റസ്റ്ററന്റിലെ മെനു കാർഡിൽ കണ്ണോടിച്ച് അതിലുള്ളതെല്ലാം കാണാതെ പറയുക, അഞ്ചു മീറ്റർ അകലെ പിടിച്ച ദിനപത്രത്തിലെ വാർത്തകൾ തെറ്റാതെ വായിക്കുക, നൂറു വർഷം മുൻപുള്ള കലണ്ടറിലെ തീയതിയും ദിവസം കണക്കുകൂട്ടി പറയുക - സാധാരണ മനുഷ്യർക്ക് അസാധ്യമായ കാര്യങ്ങളാണ് അദ്ഭുത പ്രവൃത്തി പോലെ അജി ചെയ്തു കാണിക്കുന്നത്. പതിനഞ്ചു ഭാഷകൾ അനായാസം കൈകാര്യം ചെയ്യുന്ന അജിയുടെ പേരിനൊപ്പം ഇപ്പോൾ "ഐക്യു മാൻ ഓഫ് കേരള' എന്നൊരു പ്രശസ്തിയും വന്നു ചേർന്നിരിക്കുന്നു. ഇതൊക്കെ എങ്ങനെ സാധിക്കുന്നു എന്നു ചോദിച്ചപ്പോൾ എട്ടു വർഷം മുൻപ് ജീവിത്തിലുണ്ടായ ഒരു സംഭവമാണ് അജി വിവരിച്ചത്.

“ഒരു ബസ് യാത്രയ്ക്കിടെയാണ് അദ്ദേഹത്തെ ആദ്യമായി കണ്ടത്. കണക്കിലെ അക്കങ്ങൾ ഉപയോഗിച്ച് അദ്ദേഹം കുറേ ടിക്കുകൾ കാണിച്ചു. പേരെന്താണെന്നു ഞാൻ ചോദിച്ചപ്പോൾ അദ്ദേഹം ഗോപാലകൃഷ്ണൻ എന്നാണു പറഞ്ഞത്. എന്റെ വീട്ടിലെ സാഹചര്യങ്ങളും കോളജിൽ വച്ചു പഠനം മുടങ്ങിയതുമൊക്കെ ഞാൻ അദ്ദേഹത്തോടു പറഞ്ഞു. എന്റെ മൊബൈൽ നമ്പർ വാങ്ങിയ ശേഷം ഇടയ്ക്കു വച്ച് അദ്ദേഹം ബസ്സിൽ നിന്ന് ഇറങ്ങി.