ഹൃദയം പറയും സർവം ഭാഗ്യം

മിനിസ്ക്രീനിലെ ചിരിതാരം സൗമ്യ ഭാഗ്യൻപിള്ള ബിഗ് സ്ക്രീനിലും ചുവടുറപ്പിക്കുന്നു

- അമ്മു ജാവാസ്

ഡാൻസ്, സ്കിറ്റ്, അളിയൻസ്

പുന്നപ്ര പ്രശാന്തിന്റെ (അയ്യപ്പ ബൈജു) ട്രൂപ്പിൽ ഞാൻ ഡാൻസ് പ്രോഗ്രാം ചെയ്യുന്നുണ്ടായിരുന്നു. കൊച്ചിൻ ഗിന്നസ്സിലേക്ക് ഒരു പെൺകുട്ടിയെ വേണമെന്നറിഞ്ഞപ്പോൾ ചേച്ചിയുടെ ഭർത്താവായ ആലപ്പി ഗോപകുമാറാണ് "നമ്മുടെ സൗമ്യയേ നോക്കിക്കൂടെ' എന്നു പ്രശാന്തേട്ടനോടു ചോദിക്കുന്നത്. അങ്ങനെ 20 വർഷം മുൻപ് കൊച്ചിൻ ഗിന്നസ്സിൽ എത്തി.

അഞ്ചു വർഷം ഞാനവിടെയുണ്ടായിരുന്നു. നൃത്തം ചെയ്യാനാണ് ചെന്നതെങ്കിലും അഭിനയത്തിലെ അരങ്ങേറ്റം അവിടെ വച്ചു നടന്നു. സ്കിറ്റിൽ ഫിഗർ ഷോ ഉണ്ടല്ലോ... നസീറും സത്യനുമൊക്കെ വേദിയിലെത്തുമ്പോൾ ഷീലയും ശാരദയുമായി നമ്മളും എത്തും. പിന്നെ, ചെറിയ കഥാപാത്രങ്ങൾ ചെയ്തു തുടങ്ങി. സിനിമാല, കേസി ടിവി, കോമഡി മിക്സും പിന്നെ ഞാനും, മറിമായം എന്നീ പരിപാടികളിലൂടെ ഞാനും കോമഡി ആർട്ടിസ്റ്റായി.