ഉണ്ടോ വേണ്ടത്ര വൈറ്റമിൻ

ആരോഗ്യത്തിന് ഏറ്റവും ആവശ്യമുള്ള വൈറ്റമിനുകളെ അടുത്തറിയാം. കുറവുണ്ടെങ്കിൽ പരിഹരിക്കാം

- രാഖി റാസ്

എഴുന്നേൽക്കുമ്പോഴേ ക്ഷീണം, ദിവസം മുഴുവൻ ഉറക്കം തൂങ്ങുന്ന അവസ്ഥ, മുടി കൊഴിച്ചിൽ, ചർമത്തിന് പ്രായക്കൂടുതൽ... ചെക്കപ്പിൽ പ്രത്യേകിച്ചു രോഗങ്ങളൊന്നുമില്ല, എന്നാലോ ജീവിതം ആരോഗ്യകരമായി തോന്നുന്നുമില്ല.

ഈ അവസ്ഥയ്ക്കു കാരണം ശരീരത്തിൽ ജീവകങ്ങളുടെ അഥവാ വൈറ്റമിനുകളുടെ കുറവാകാം. എളുപ്പം പരിഹരിക്കാവുന്നതും എന്നാൽ ആരോഗ്യകാര്യത്തിലെ അശ്രദ്ധ മൂലം പരിഹരിക്കപ്പെടാതെ പോകുന്നതുമായ പ്രശ്നമാണിത്. എന്തൊക്കെ ജീവകങ്ങളുടെ കുറവ് ആണ് പൊതുവേ കാണാറുള്ളത്, എങ്ങനെ അവ പരിഹരിക്കണം എന്നെല്ലാം ജീവകങ്ങൾ തന്നെ പറഞ്ഞു തരും.

ഞങ്ങളുടെ ജോലി എന്തെന്നറിയാമോ ?

നിങ്ങളുടെ സുന്ദരമായ ശരീരത്തിന്റെ പ്രവർത്തനം ശരിയായി മുന്നോട്ടു കൊണ്ടുപോകലാണ് ഞങ്ങളുടെ ഉദ്ദേശവും ലക്ഷ്യവും. മൈക്രോ ന്യൂട്രിയന്റ്സ് എന്ന ഞങ്ങളില്ലാതെ നിങ്ങളുടെ ജീവിതം പൂർണമാകില്ല എന്നു തന്നെ പറയാം.

മൈക്രോ ന്യൂട്രിയന്റ്സിൽ ഏറ്റവും പ്രധാനപ്പെട്ട വൈ റ്റമിനുകൾ കൂടാതെ അയൺ, ക്രോമിയം, അയഡിൻ, കോ പ്പർ, സിങ്ക് തുടങ്ങിയവരുമുണ്ട്. തൽക്കാലം ഞങ്ങളുടെ കാര്യം മാത്രം പറയാം.

സമീകൃതമായി ആഹാരം കഴിക്കുകയാണെങ്കിൽ പ്രശ്നമൊന്നുമില്ലാതെ കാര്യങ്ങൾ മുന്നോട്ട് കൊണ്ടുപോകാൻ ഞങ്ങൾക്കു കഴിയും.

ആഹാരത്തിൽ നിന്നും ഞങ്ങൾ ഓരോരുത്തരും ശരീരത്തിലേക്ക് ആഗിരണം ചെയ്യപ്പെടുന്നൽ വയറിന്റെയും കുടലിന്റെയും പല ഭാഗങ്ങളിൽ വച്ചാണ്.

എന്നാൽ നിങ്ങളുടെ ദഹനപ്രക്രിയ ശരിയായി നടക്കുന്നില്ലായെങ്കിൽ ആഗിരണം ചെയ്യപ്പെടാതെ, ഞങ്ങൾക്ക് പു റത്തു പോകേണ്ടി വരും. ശരീരം വൈറ്റമിനുകളുടെ കുറവിലേക്കും അനുബന്ധ പ്രശ്നങ്ങളിലേക്കു കടക്കും.

വൈറ്റമിൻ എ

റെറ്റിനോൾ എന്നാണ് എന്റെ ശരിക്കുള്ള പേര്. ജീവനു തന്നെ ആധാരമായ പോഷകമൂലകങ്ങളിലൊന്നാണു ഞാൻ. കണ്ണുകളുടെയും ചർമത്തിന്റെയും ആരോഗ്യം സംരക്ഷിക്ക ലാണു ജോലി. നല്ല കാഴ്ച, തിളക്കമാർന്ന ആരോഗ്യമുള്ള ചർമം എന്നിവ വേണമെങ്കിൽ ഞാൻ കൂടിയേ തീരൂ.

എന്റെ കുറവ് നിശാന്ധത അഥവാ നൈറ്റ് ബ്ലൈൻഡ്സ്സിന് കാരണമാകാം. നിശാന്ധത ഒരു പ്രാരംഭ ലക്ഷണമാണ്. അന്ധത ക്രമേണ വളർന്നേക്കാം. ചർമത്തെ കൂടാതെ ശ്വാസകോശം, കുടൽ, മൂത്രനാളി എന്നിവയുടെ ആവര ണത്തെ ആരോഗ്യകരമായി നിലനിർത്താനും അണുബാധയിൽ നിന്നു സംരക്ഷിക്കാനും എന്റെ സാന്നിധ്യം അത്യന്താപേക്ഷിതമാണ്.