കരുതൽ മാത്രമാണ് പ്രതിരോധം

100 ശതമാനം മരണ സാധ്യത കൽപിക്കപ്പെടുന്ന അപൂർവ രോഗമാണ് മസ്തിഷ്ക ജ്വരം

- ഡോ.ബി.പത്മകുമാർ പ്രിൻസിപ്പൽ ഗവ. മെഡിക്കൽ കോളജ്, കൊല്ലം

പല തരത്തിലുള്ള പകർച്ചപ്പനികൾ പടരുന്നതിനിടയിൽ അമീബിക് മസ്തിഷ്ക ജ്വരം എന്ന രോഗത്തിന്റെ ആവിർഭാവം പരക്കെ ആശങ്കയുണ്ടാക്കിയിട്ടുണ്ട്. രോഗം അത്യപൂർവമാണെങ്കിലും ഏറെ മാരകമാണെന്നതാണു പ്രശ്നം. രോഗം ബാധിച്ചാൽ മരണ സാധ്യത ഏകദേശം 100 ശതമാനം പ്രചരിക്കുന്നതുപോലെ രോഗകാരിയായ ഏകകോശ ജീവി തലച്ചോർ തിന്നുന്നൊന്നുമില്ല, മറിച്ചു മറ്റെല്ലാ മസ്തിഷ്ക ജ്വരവും (എൻസിഫലൈറ്റിസ്) പോലെ മസ്തിഷ്ക കോശങ്ങൾക്കും തലച്ചോറിന്റെ ആവരണ ത്തിനും നീർക്കെട്ടുണ്ടാക്കുകയാണു ചെയ്യുന്നത്. ഒപ്പം കോശങ്ങളെ നശിപ്പിക്കുകയും ചെയ്യാം.

ഫലപ്രദമായ മരുന്നോ വാക്സീനോ ലഭ്യമല്ലാത്ത ഈ മാരകരോഗത്തെ ചെറുക്കാൻ ജലാശയങ്ങൾ മലിനമാകാതെ നോക്കുകയെന്നതാണു പ്രധാന മാർഗം. ജല കായിക വിനോദങ്ങളിലേർപ്പെടുന്നവരും തൊഴിലും മറ്റുമായി ജലാശയങ്ങളുമായി നിരന്തരം ബന്ധപ്പെടുന്നവരും ചില മുൻകരുതലുകൾ സ്വീകരിക്കുകയും വേണം.

അപൂർവങ്ങളിൽ അപൂർവരോഗം

ഈ നൂറ്റാണ്ടിന്റെ ആദ്യ ദശകം വരെ ലോകത്താകമാനം 310 അമീബിക് മസ്തിഷ്ക ജ്വരം കേസുകൾ മാത്രമാണ് റിപ്പോർട്ട് ചെയ്തിട്ടുള്ളത്. മറ്റു പല അപൂർവ രോഗങ്ങളും പോലെ വൻകരകൾ കടന്ന് അതിർത്തികൾ താണ്ടി അമീബിക് എൻസിഫലൈറ്റിസ്നമ്മുടെ നാട്ടിലുമെത്തി എന്നതു കൊണ്ടാണ് നമുക്ക് ഇക്കാര്യത്തിൽ കൂടുതൽ ജാഗ്രത വേണ്ടത്.