കൊളസ്ട്രോൾ മരുന്നുകൾ, അളവ് നോർമൽ ആയാൽ നിർത്താമോ?

സോഷ്യൽമീഡിയ വഴി പ്രചരിക്കുന്ന ആരോഗ്യ സംബന്ധമായ തെറ്റിധാരണകൾ അകറ്റാം. കൃത്യമായ വിശദീകരണങ്ങളുമായി

- ഡോ.ബി.പത്മകുമാർ പ്രഫസർ, മെഡിസിൻ, മെഡിക്കൽ കോളജ്, ആലപ്പുഴ

ആൻ ആപ്പിൾ എ ഡെ കീപ്സ് ദ് ഡോക്ടർ എവേ'എന്നൊരു പഴഞ്ചൊല്ലുണ്ട് - ദിവസവും ഒരു ആപ്പിൾ കഴിക്കുകയാണെങ്കിൽ ഡോക്ടറെ കാണേണ്ടി വരില്ല എന്നർഥം. ആപ്പിളിലടങ്ങിയിരിക്കുന്ന പോഷകങ്ങൾ ഹൃദ്രോഗത്തെ പ്രതിരോധിക്കുമെന്നതാണ് കാരണം.

ഉയർന്ന കൊളസ്ട്രോളിന്റെ ചികിത്സയ്ക്ക് ഉപയോഗിക്കുന്ന സ്റ്റാറ്റിൻ ഗുളികകൾക്കും ഹാർട്ട് അറ്റാക്കിനെയും സ്ട്രോക്കിനെയും പ്രതിരോധിക്കാൻ കഴിയുമെന്നു പുതിയ പഠനങ്ങൾ സൂചിപ്പിക്കുന്നു. അതുകൊണ്ടാണ് കൊളസ്ട്രോൾ നോർമലായാലും സ്റ്റാറ്റിനുകൾ തുടരാൻ ഡോക്ടർമാർ നിർദേശിക്കുന്നത്.

ശരീരത്തിന് ആവശ്യമുള്ള കൊഴുപ്പു ഘടകമാണു കൊളസ്ട്രോൾ. കൊഴുപ്പിൽ അലിയുന്ന ജീവകങ്ങളുടെ ആഗിരണത്തിനും സ്റ്റിറോയ്ഡ് ഹോർമോണുകളുടെ ഉൽപാദനത്തിനും കോശസ്തരത്തിന്റെ നിർമിതിക്കുമൊക്കെ കൊളസ്ട്രോൾ വേണം.