വീടൊരുങ്ങട്ടെ ആഘോഷമായി

തട്ടുംപുറത്ത് ഇരിക്കുന്നവയ്ക്ക് തട്ടുപൊളിപ്പൻ മേക്കോവർ നൽകാം

- അമ്മു ജൊവാസ്

ആഘോഷങ്ങൾക്കായുള്ള കാത്തിരിപ്പും ഒരുക്കങ്ങളും മനസ്സിനെ കൂടുതൽ ചെറുപ്പമാക്കും. അതുപോലെയാണു വീടിന്റെ കാര്യവും. വിശേഷാവസരങ്ങൾക്കു വേണ്ടിയുള്ള ഓരോ ചെറിയ മാറ്റങ്ങൾ പോലും വീടിനു നവോന്മേഷം നൽകും. അതു വീടിനുള്ളിലും വീട്ടിലുള്ളവരിലും സന്തോഷം നിറയ്ക്കും.

വിഷു വന്നെത്തിയല്ലോ, ഇക്കുറി റീസൈക്ലിങ് മോടിപ്പിടിപ്പിക്കൽ ആകാം.

സോഫ്റ്റ് ഫർണിഷിങ്ങിൽ തുടങ്ങാം

 ആഘോഷങ്ങൾക്കു യോജിക്കുന്ന കളർ തീം തിരഞ്ഞടുത്താൽ തന്നെ വീടിന്റെ മൂഡ് മാറുമെന്നു പറയേണ്ട കാര്യമില്ലല്ലോ. വിഷുനാളിനു മഞ്ഞയും വെള്ളയും കോംബോ, കസവിന്റെ സ്വർണവും ഐവറിയും ചേർന്ന കോംബോ എന്നിവ നന്നായി ഇണങ്ങും.

പഴയ കസവുസാരി കർട്ടനായും കുഷൻ കവറായും മാറട്ടെ മഞ്ഞ നിറത്തിലുള്ള തുണിയൊന്നും കിട്ടിയില്ലെങ്കിൽ പഴയ മുണ്ടിന്റെ കര വെട്ടിമാറ്റി മഞ്ഞ ഡൈ മുക്കിയെടുത്താലും മതി.

പഴയ ബെഡ് ഷീറ്റിൽ നിന്ന് ഒരേ നീളത്തിൽ തുണി മുറിച്ചെടുത്ത്, മുടി പിന്നുന്നതുപോലെ പിരിച്ചു ഫ്ലോർ മാറ്റ് തയാറാക്കാം. കളർ തീം മനസ്സിലുണ്ടായാൽ മതി. ക്രോഷേ ചെയ്യാനറിയുന്നവർക്ക് അവരവരുടെ മനസ്സിലുള്ള ഡിസൈൻ അനുസരിച്ചു ക്രോഷേ മാറ്റും റഗുമൊക്കെ ഇതുപയോഗിച്ച് ഉണ്ടാക്കാം.

പഴയ കസേരകൾക്കു മേക്കോവർ നൽകി ആക്സന്റ് ചെയറാക്കി അകത്തളത്തിൽ ഇട്ടോളൂ. സാൻഡ് പേപ്പർ കൊണ്ടു നന്നായി ഉരച്ചു മിനുസമാക്കി പോളിഷ് ചെയ്തെടുത്താൽ മുത്തശ്ശൻ കസേരയ്ക്കും ന്യൂ ജെൻ ലുക്ക് വരും. ഇതിന്റെ പുറത്തിടാൻ പഴയ ഒരു കസവു ഷാൾ കൂടിയായാൽ അടിപൊളി.