പണി പാളാത്ത ചിരി

 കാലം മാറി, തമാശകളിൽ കൂടുതൽ ശ്രദ്ധ വേണമെന്നു രമേഷ് പിഷാരടി പണി പാളാത്ത ചിരി

- വിജീഷ് ഗോപിനാഥ്

യാത്രയിൽ ചിരിപാളി പണി കിട്ടിയ അനുഭവം പറയാമോ? അശ്വതി,പ്ലാവറ, പച്ച, തിരുവനന്തപുരം

കഴിഞ്ഞ ഡിസംബറിൽ ഓസ്ട്രേലിയയിൽ പോയി. വിമാനത്താവളത്തിലെ പരിശോധനയിൽ എന്റെ മുഖവും പാസ്പോർട്ടിലെ മുഖവും കണ്ടു വലിയ സംശയം. പാസ്പോർട്ടിൽ താടിയില്ല. ഇപ്പോൾ മുടി ട്രെയ്റ്റൻ ചെയ്തിരിക്കുന്നു. ബയോമെട്രിക്കൽ സംവിധാനം ഉണ്ടായിരുന്നുമില്ല.

സംശയം തോന്നി പിടിച്ചു നിർത്തി. ഞാനവരോടു പറഞ്ഞു. നിങ്ങൾ ഒന്നു ഗൂഗിൾ ചെയ്തു. എന്റെ ഡീറ്റെയ്ൽസ് കിട്ടും. ഗൂഗിൾ സെർച്ചിൽ വന്നത് പഴയ ടിവി പരിപാടികൾ. പലതും പല കോലത്തിൽ. ഒടുവിൽ അറിയാവുന്ന ഭാഷയിൽ പറഞ്ഞൊപ്പിച്ചു. "ഞാനൊരു ആക്ടറാണ്. അപ്പോൾ അവർ പൊയ്ക്കോളാൻ പറഞ്ഞു.

പീലി എന്ന പേരു മകൾക്കിടാനുള്ള പ്രേരണ എന്താണ്?
വിനിഷ മനോജ്, അധ്യാപിക, ബിഇഎം യുപി സ്കൂൾ, ചെമ്പോല വടകര

ഭാര്യയുടെ വീട് പുണെ ആണ്. മോളുടെ ജനനവും അവിടെ വച്ചായിരുന്നു. ജനിച്ച സമയത്തു മകൾക്കു ചെറിയ മഞ്ഞനിറം ഉണ്ടായിരുന്നു, മഞ്ഞയ്ക്ക് ഹിന്ദിയിൽ പീലാ എന്നാണു പറയുന്നത്. മഞ്ഞയുണ്ട്. പീലാ ഹേ എന്നു നേഴ്സ് പറഞ്ഞു. അപ്പോഴാണു പീലി നല്ല പേരാണെന്ന് ഓർത്തത്.