சமூகநீதிக்கான தொடர் போராட்டம் தொடரும்...!

சமூக நீதி என்கிற ஒரு கொள்கைதான் என்னை சுயமரியாதையுள்ள ஒரு மனுசியாக தன்னம்பிக்கை கொண்ட ஒரு தலைவியாக இந்தச் சமூகத்தில் அடையாளப்படுத்தியது.

- கவிதா

இந்தியாவிலேயே பழங்குடியினரும் பிற்படுத்தப்பட்ட பட்டியல் இதர மக்களும் பெண்களும் அதிகம் படித்தவர்களாக, பட்டதாரிகளாக, பதவிக்காரர்களாக இருப்பது தமிழ்நாட்டில்தான். காரணம் திராவிட இயக்கம்.

இப்படிச் சொல்கிறவர் யாரோ திராவிட இயக்கத்தின் உயர் பொறுப்பு வகிக்கிற ஒருவர் அல்ல. ஒரு கிராமப் பஞ்சாயத்தின் தலைவர் பொறுப்பை பொறுப்போடு செயல்படுத்திக் கொண்டிருக்கிற ஊராட்சி மன்றத் தலைவர் கவிதா தான்.

பொதுவாக சமூக அரசியலில் பெண்கள் பொறுப்பில் இருந்தாலும் அவர்களை இயக்குகிற சக்தியாக ஆண்களே இருப்பார்கள் என்கிற எழுதப்படாத விதியைக் கடந்து, ஆணாதிக்கமும் சமூகக் கட்டுகளும் நிறைந்த ஒரு ஊராட்சியில் (கிராம பஞ்சாயத்தில்) தனித்துவமான தலைவராக இருந்து சாதிய, ஆணாதிக்க அச்சுறுத்தல்களையும் எதிர்கொண்டு களத்தில் நிற்கிறார் கவிதா.

“இன்னைக்கு இந்தியாவிலேயே பட்டியல் பழங்குடி மக்கள், ஓபிசி மக்கள், பெண்கள் அதிகம் பேர் படிச்சு பதவிக்கு வந்திருப்பதும், என்ன மாதிரி அரசு அதிகாரப் பொறுப்புகள் வகிப்பதும் தமிழ்நாட்டில்தாங்க அதிகம். வடநாடுகளில் எல்லாம் இந்த மாற்றம் இல்லீங்க.''

சமூக நீதி, சுயமரியாதை, திராவிட மாடல் என்றெல்லாம் நாம் பெருமையோடு குறிப்பிடுகிற சொல்லாடல்கள் வெற்றுச் சொற்கள் இல்லை அவை வெற்றியின் அடையாளங்கள் என்பதற்கு சான்றாகத் திகழும் ஊராட்சி மன்றத் தலைவர் கவிதா அவர்களைத் தேடி நாம் கோயம்புத்தூர் சென்றபோது நமக்கு சில அதிர்ச்சிகளும் சில ஆச்சர்யங்களும் கூடவே ஒரு மகிழ்ச்சியும் ஏற்பட்டது.