வினைதீர்க்கும் விநாயகன்!

விநாயகனே வினைதீர்ப்பவனே.. வேழ முகத்தோனே.. ஞான முதல்வனே.

- மாலதி சுந்தரராஜன்

ஆம், நம் வினைகள் அனைத்தையும் தீர்க்கும் சர்வ வல்லமை படைத்த கடவுள் விநாயகப் பெருமான்! ஏழுலகும் போற்றும் எழில் மிகு நாயகன் கஜமுகன்! ஆவணி சதுர்த்தியில், விசாக நன்னாளில் அவதரித்து,முன்னின்று காக்கும் மூலாதாரக் கடவுள் மூஷிகவாகனன்! ஏழு கோடி மந்திரங்களுக்கு நடுவே ஒளி மயமான பிரணவங்களிலிருந்து சிவபெருமான்,பார்வதிதேவியின் அருளுடன் அவதரித்த ஞானக் குழந்தை விநாயகர்! அன்பை அருளும் ஆனைமுகத்தோன்! விக்கின சமர்த்தனெனும் அருள் ஆழி என்கிறார் அருணகிரிநாதர்! விக்னங்களை அகற்றும் அருட்கடல் கணநாதன்! பண்டாசுரனை வதைக்க காமேஸ்வரியாக பார்வதி தேவி, சிவ பெருமானிடம் சென்று ஏகாட்சர மந்திர உபதேசம் பெற்று, விக்ன சக்தியை உற்பவிக்கிறாள்.

யானை பலம் கொண்ட அந்த சக்திநாதன் கணங்களுக்கெல்லாம் அதிபதியாகி, அசுரனை வதைக்க, கணபதி எனும் திருநாமத்தைப் பெற்று, தம் ஞானத்தினால் எங்கும் வியாபித்து அருள் புரிகிறார்! தனக்கு நிகரில்லாத நாயகனாக இருந்து, விநாயகர் ஆகிறார்! கஜமுகாசுரனை சம்காரம் செய்து, மூஷிக வாகனமாக தன் திருவடியின் கீழ் அமர்த்திக் கொண்ட கஜகர்ணன் கணேசக் கடவுள்! பகைவனுக்கும் அருள் புரிவதில் ஆறுமுகனும், ஆனைமுகனும் ஒன்றுதான்!