ബ്രെയിൻ അറ്റാക്ക്, അഥവാ സ്ട്രോക്ക് ഭയക്കേണ്ടതുണ്ടോ?

തലച്ചോറിലെ കോശങ്ങളിലേക്കുളള രക്തം ആവശ്യത്തിന് ലഭിക്കാതതെ തലച്ചോറിന്റെ പ്രവർത്തനം പെട്ടെന്ന് നിലച്ചുപോവുകയോ മന്ദീഭവിക്കുകയോ ചെയ്യുന്ന അതിവേഗ ഗുരുതരാവസ്ഥയാണ് സ്ട്രോക്ക് അഥവാ ബ്രെയിൻ അറ്റാക്ക്.

- ഡോ. ഗിരിശങ്കർ

 ഈ അവസ്ഥയെ പക്ഷാഘാതം എന്ന്  വിളിക്കും. ഈ രോഗം മൂലം മരണമടയുന്നവരുടെ എണ്ണം കൂടി വരികയാണ്. കേരളത്തിൽ അടുത്തകാലത്ത് പക്ഷാഘാതത്തിന്റെ നിരക്ക് ക്രമാതീതമായി കൂടുന്നതായി കാണുന്നു. പ്രമേഹം, രക്തസമ്മർദ്ദം, രക്തത്തിലെ അമിതമായ കൊഴുപ്പ്, പുകവലി, വ്യായാമ ക്കുറവ്, മാനസികമായ പിരിമുറുക്കം എന്നിവയെല്ലാം രക്തക്കുഴലുകളിൽ കാലക്രമേണ ബ്ലോക്ക് ഉണ്ടാക്കുകയും പക്ഷാഘാതം ഉണ്ടാകുന്നതിന് കാരണമായി തീരുകയും ചെയ്യുന്നു.

ജീവിതശൈലി രോഗങ്ങളുടെ അമിതമായ കൂട്ടുകെട്ട് സ്ട്രോക്കിലേക്ക് നയിക്കുന്നു എന്നുള്ളതാണ് സത്യം. മുൻകാലങ്ങളിൽ 60 വയസ്സ് കഴിഞ്ഞവരിൽ ആയിരുന്നു സ്ട്രോക്ക് കൂടുതലായി കണ്ടുവന്നിരുന്നത്. എന്നാൽ ഇപ്പോൾ സ്ഥിതി മറിച്ചാണ്. 50 വയസ്സിന് താഴെ പ്രായമുള്ളവരിലേക്കും കൗമാരപ്രായക്കാരിലും സ്ട്രോക്ക് എത്തിനിൽക്കുന്ന ഭയാനകരമായ അവസ്ഥയാണ് ഇന്നുള്ളത്.

ജീവിതചര്യയിൽ വന്ന മാറ്റങ്ങൾ മാനസിക സമ്മർദ്ദം, വ്യായാമക്കുറവ്, ഫാസ്റ്റ് ഫുഡ് സംസ്കാരം എന്നിവയെല്ലാം പ്രായഭേദമെന്യേ ചെറുപ്പക്കാരിൽ പോലും പക്ഷാഘാതം എന്ന മാരകമായ രോഗങ്ങൾക്ക് അടിമയായി മാറിയിരിക്കുന്നു. പുരുഷന്മാരിലും സ്ത്രീകളിലും സ്ട്രോക്കിന്റെ സാധ്യത ഏറെക്കുറെ ഒരുപോലെയാണ്.