தண்ணீர் பிரச்சினையை தீர்க்கும் ஸ்மார்ட் செயலி சரண்யா!.

இன்றைய டிஜிட்டல் இந்தியாவில்... எங்கு திரும்பினாலும் அடிதான் என்ற நிலையில் பரிதாபகரமான நிலையில் இருப்பவர்கள் விவசாயிகள்தான்.

- தவா

மழை பெய்தாலும் பிரச்சினை, மழை இல்லாவிட்டாலும் பிரச்சினை... என்ற வகையில் விவசாயிகளை கடும் நெருக்கடியில் தள்ளியுள்ளனர் வீண் விளம்பர ஆட்சியாளர்கள்.

இந்நிலையில் அறிவியல் கண்டுபிடிப்புகள் விண்ணை நோக்கி மட்டும் அல்லாமல் வாழும் மண்ணை நோக்கியும் இருக்க வேண்டும் என்பதை உலகிற்கு உணர்த்தியுள்ளார் அரியானாவைச் சேர்ந்த பிளஸ் 2 மாணவி சரண்யா மேத்தா.

வேளாண்துறையில் பெரும் புரட்சியை ஏற்படுத்தும் வகையில் சென்சார்கள், செயற்கைக்கோள் தரவுகள், விவசாயிகளின் அனுபவங்களின் மூலம் கிடைத்த பல்வேறு தகவல்களின் அடிப்படையில் ஸ்மார்ட் நீர்பாசன செயலி ஒன்றை உருவாக்கியுள்ளார் சரண்யா.

எந்த நேரத்தில் மழை பெய்யும், எப்போது வறண்ட வானிலை நிலவும், நீர் பாசனம் செய்த பிறகும் தொடரும் வறண்ட வானிலையால் பயிர்கள் நீரின்றி கருகும் நிலை ஏற்பட்டால் என்ன செய்வது, அல்லது தொடர் கனமழை பெய்து பயிர்கள் முழுவதும் வெள்ளத்தில் அடித்துச் செல்லப்பட்டால் எப்படி சமாளிப்பது போன்ற பிரச்சினைகளுக்கு ஒரு தீர்வை கொண்டு வந்துள்ளது சரண்யாவின் கண்டுபிடிப்பு.

கோடை விடுமுறையின் போது சிறுவயதில் சரண்யாவின் பெரும்பாலான பொழுதுகள் அல்வாரில் உள்ள அவரது பூர்வீக கிராமத்தில் தான் கழிந்தது. சூரியனின் வெப்பத்தில் வறண்ட நிலங்கள் விரிசல் பட்டுக் கிடப்பதையும், பயிர்கள் வாடியிருப்பதையும் கண்ட சரண்யா நீர்பாசனம் முறையாக கிடைக்காமல் தாவரங்கள் வாடி விடுவதை கவனித்தார்.