குறட்டைக்கு நன்றி!

தூக்கத் திற்கான அளவுகோல் குறட்டை அல்ல! ஒருசிலருக்கு அது எச்சரிக்கை மணி! குறட்டை ஏன் ஏற்படுகிறது என்பதை முதலில் தெரிந்து கொள்ளலாம்.

- டாக்டர் அகிலாண்ட பாரதி- டாக்டர் தேவி பிரபா

பொதுவாக நாம் சுவாசிக்கும் காற்று முதலில் மூக்கு வழியே நுழைந்து பின், சுவாசப்பாதை (தொண்டையின் பின்புறம் உள்ள nasopharynx பகுதி) மற்றும் காற்றுக் குழாய் (trachea) வழியாக நுரையீரலுக்குள் செல்கிறது.

மல்லாந்து படுத்திருக்கும் பொழுது, மூக்கு, தொண்டையின் பின்பகுதி போன்றவற்றில் ஏதேனும் தொந்தரவு ஏற்பட்டிருந்தால், காற்று உள்ளே செல்லும் பொழுது சத்தம் ஏற்படுகிறது.

குறுகியிருக்கும் சுவாசப்பாதையில், காற்று செல்லும்பொழுது அப்பகுதிகள் அதிர்வடைந்து குறட்டையை ஏற்படுத்துகின்றன.

உலக அளவில் 40 முதல் 60 சதவீதம் வரையிலான மக்களுக்கு குறட்டை ஏற்படுகிறது. எல்லா குறட்டைகளும் பிரச்சனைக்குரியவை அல்ல. சளி பிடிக்கும் நேரத்தில் நம் தொண்டை, மூக்கு இவற்றில் தற்காலிகமாக நீர்கோர்த்திருக்கும். அதன் வழியே காற்று செல்லும் பொழுது சத்தம் கேட்கும்.

இதனால் தூக்கத்திற்கு பெரிய பாதிப்பு ஏற்படாது.

யாருக்கெல்லாம் அதிகப்பிரச்சனைகள் உருவாகலாம்?

*அதிகப்படியான உடல் எடை கொண்டவர்களுக்கு படுத்திருக்கும் பொழுது கழுத்தில் சேர்ந்திருக்கும் கொழுப்பு சுவாசப் பாதையின் வெளியில் இருந்து அழுத்தம் கொடுக்கிறது. இதனால் குறட்டை ஏற்படும்.

*மூக்கில் 'பாலிப்' எனப்படும் சதைக்கட்டி உள்ளவர்களுக்கும் தொண்டையில் டான்சில், அடினாய்டு கட்டி தொந்தரவு கொண்டவர்களுக்கும் சுவாசப்பாதை குறுகலாவதன் காரணமாக காற்று நுழைகையில் தடை ஏற்படும்.

*மதுப்பழக்கம் உள்ளவர்களுக்கு அவர்களை அறியாமலேயே சுவாசப் பாதையில் உள்ள தசைகள் தளர்ந்த நிலைக்குப் போய்விடும். அதன் காரணமாக குழல் போல் இருக்க வேண்டிய சுவாசப் பாதை சுருங்கி, அரைகுறையாகக் காற்று உள்ள நுழைகையில் ஓசை ஏற்படுகிறது.

*புகைப்பிடிப்பவர்களுக்கு சுவாசப் பாதையில் அழற்சி ஏற்பட்டிருக்கும். அதுவும் குறட்டை வருவதற்குக் காரணம்.

*எந்தவிதக் கெட்ட பழக்கமும் இல்லாதவர்கள் கூட முதுமையை அடையும் பொழுது அவர்களது தசையின் இறுக்கம் குறையும். அதனால் குறட்டை ஏற்படும்.

சிலருக்கு இயற்கையாகவே இருக்கும் குறுகலான தாடை அமைப்பினால் அதிகப்படியான சத்தம் உருவாகும். மற்றவரின் தூக்கத்திற்கு தொந்தரவு செய்யும் அளவுக்கு இது மாறக் கூடும்.