எப்படி இருந்த அ.தி.மு.க. இப்படி ஆகிடுச்சே!

குடும்பங்களில் குழந்தைகளுக்கு பூச்சாண்டி காட்டி பயமுறுத்துவது போல், அரசியலிலும் சில கட்சியினரை பீதியூட்டி கூட்டு சேர்க்க முயல்வதுண்டு.

- 

வராத கட்சியை குறிப்பிட்டு, 'அவர்களுடன் கூட்டணி வைக்க கொள்கை இடம் கொடு க்கவில்லை. நம் இருவர் கட்சியும் இரட்டை குழல் துப்பாக்கி' என்று ஆதுரமாய் பேசுவார்கள்.

அப்படித்தான் 'கரூர் சம்பவத்துக்கு பிறகு' த.வெ.க. செயல்பாடு தளர்ந்து கிடப்பதாக சம்பந்தம் இல்லாதவர்கள் எல்லாம் சீரியஸாக விவாதித்துக் கொண்டிருக்கும் நிலையில்... விஜயை ஆளாளுக்கு கூப்பிடுகிறார்கள் - ஆசை ஊட்டியல்ல, பீதியூட்டி என்பது தான் ஹைலைட்.

அதிலும் பிரதான எதிர்க்கட்சியான அ.தி.மு.க.வே தொடர்ந்து த.வெ.க.வுக்கு சிக்னல் கொடுத்து வருவது தான் ஆச்சர்யம் அளிப்பதாக உள்ளது.

இதுவரை கட்சித்தலைவர் எடப்பாடி பழனிசாமி உட்பட பல தலைவர்களும் அழைப்பு விடுத்தாலும், ஆர்.பி. உதயகுமார் சமீபத்தில் விடுத்த அழைப்பு வித்தியாசமானது தான்.

“சரியான நேரத்தில் சரியான முடிவெடுத்தவர்கள் தான் மக்கள் பணியை செய்ய முடியும். ஆந்திராவில் சிரஞ்சீவி தனிக்கட்சியை தொடங்கியபோது சரியான முடிவை எடுக்காததால் கட்சியைக் கலைத்துவிட்டார். இன்று பவன் கல்யாண் துணை முதலமைச்சராக பதவியேற்றதற்கு சரியான முடிவை எடுத்தது தான் காரணம்” என்று விஜய்க்கு 'லாலிபாப்' நீட்டுகிறார்.

தங்கள் கூட்டணிக்கு வந்து துணை முதல்வர் பொறுப்பை ஏற்றுக்கொண்டால் நல்லது என்ற தொனி அவரது அழைப்பில் உள்ளது.

அதே சமயம், ஆந்திராவில் பவன் கல்யாணின் ஜனசேனா கட்சி எதிர்கொண்ட முதல் தேர்தலில் தனித்து தான் போட்டியிட்டது என்ற உண்மையை உதயகுமார் தெரிந்து கொள்ளவில்லையா அல்லது வேண்டுமென்றே சொல்லாமல் விட்டாரா என்று புரியவில்லை.