ஜனநாயகம் நெரிப்பு...காஷ்மீர் மக்கள் கொதிப்பு?

ஜம்மு- காஷ்மீர் நூற்றாண்டு காலமாக சர்ச்சைக்கு இடமான பிரதேசமாகவே உள்ளது. காஷ்மீரின் இன்றைய நிலவரத்தை புரிந்து கொள்ள வேண்டுமானால் கடந்த கால வரலாற்றுப் பதிவுகளை உன்னிப்பாக கவனிக்க வேண்டும்.

- 

காஷ்மீரில் முஸ்லிம்களே பெரும்பான்மையினர். ஆனால் மன்னர் ஹரிசிங் இந்து. 1931-இல் மகாராஜா ஹரிசிங்கின் ஆட்சிக்கு எதிராக போராடிய 22 காஷ்மீரிகள் சுட்டுக்கொல்லப்பட்டதை நினைவுகூரும் விதமாக ஆண்டுதோறும் ஜூலை 13 -ஆம் தேதி தியாகிகள் தினமாக அனுசரிக்கப்படுகிறது. 2019இல் பிரிவு 370 ரத்து செய்யப்பட்ட பின் இது பொது விடுமுறை தினப் பட்டியலிலிருந்து நீக்கப்பட்டது.

இந்தியா சுதந்திரம் அடைந்த பிறகு காஷ்மீரை இந்தியாவுடன் மன்னர் ஹரிசிங் இக்கட்டான சூழ்நிலையில் சேர்த்தார். காஷ்மீரின் ஒரு பகுதி இப்போதும் பாகிஸ்தான் வசம் உள்ளது. இதை ஆக்கிரமிப்பு காஷ்மீர் என்று இந்தியா கூறிவருகிறது. ஆனால் இதை ஆசாத் காஷ்மீர் என்று பாகிஸ்தான் கூறிவருகிறது.

முன்பு காஷ்மீருக்கு செல்ல இன்னர் லைன் பெர்மிட் முறை இருந்தது. இது ஏறத்தாழ விசாவுக்கு சமம். இந்த அனுமதி இருந்தால் மட்டுமே காஷ்மீருக்குள் நுழைய முடியும்.

ஆனால் ஷியாம் பிரசாத் முகர்ஜி ஒரு நாட்டுக்கு இரண்டு கொடி கூடாது. இரண்டு பிரதமர் கூடாது. இரண்டு அரசியல் சாசனம் கூடாது. இரண்டு நாடாளுமன்றம் கூடாது என்று முழக்கம் இட்டதுடன் இன்னர் லைட் பெர்மிட் பெறாமல் காஷ்மீருக்குள் நுழைந்தார்.