அடங்க மறு!

யுபிஎஸ்ஸி ரிசல்ட் வந்துவிட்டது. மாநிலத்திலேயே ஒன்பதாவது இடத்தை பெற்றாள் சாவித்திரி. ஊர் உலகமே கொண்டாடின அவளை.

- 

ஆனால், அந்த சந்தோஷத்தைப் பகிர்ந்து கொள்ள அம்மா இல்லையே, என்பதை நினைத்து, உள்ளுக்குள் உடைந்து அழுதாள்.

இதே போலத்தான், பனிரெண்டாம் வகுப்புப் பொதுத் தேர்வில் மாநிலத்திலேயே ஒன்பதாம் இடத்தைப் பெற்ற செய்தியை பகிர்ந்து கொள்ள முடியாமல், ரிசல்ட் வருவதற்கு பதினெட்டு நாட்களுக்கு முன் சாவித்திரியின் அப்பா சுந்தரம் ஹார்ட் அட்டாக் வந்து இறந்து போனார்.

இப்போது அதே வரிசையில் அம்மா, யுபிஎஸ்ஸிரிசல்ட் வருவதற்கு பதினெட்டு நாட்கள் முன் இறந்து போனாள்.

'என் வாழ்க்கையில் முக்கியமான திருப்பு முனைகள் ஏற்படும் சமயத்தில், அதைப் பார்க்காமல், இப்படி அப்பாவும், அம்மாவும் போய் சேர்ந்துவிட்டார்களே..?; இதற்கு ஏதாவது அமானுஷ்யமான காரணங்கள் இருக்குமோ..?' ஒரு கணம் மனதில் இப்படித் தோன்றியது.

அடுத்த கணம், கஜா என்கிற கஜேந்திரன் சாவித்திரியின் மனதில் வந்தான்.

"ராப்பர்டு ராப்பர்' டெக்ஸ்ட் புத்தகத்தைப் படிச்சிக் கிட்டே இரு சாவித்திரி.வாழ்க்கையில் எதையும் சாதிக்கலாம்...

இதை அடிக்கடிச் சொல்லிச் சொல்லி, மனதில் பதிய வைத்தவன் கஜா.

இன்றைய யு பி.எஸ்.சி. வெற்றிக்குக் கூட காரணம் அதுதானே.!' "பப்ளிக் எக்ஸாம்ல, மாநில அளவுல சாதிக்கணும்னா, அதிர்ஷ்டம் வேணுமா சார்?” ஆறாவது படிக்கும்போது, இப்படி ஒரு கேள்வியை கஜாவிடம் கேட்டது ஞாபகம் வந்தது, சாவித்திரிக்கு.

"அதிர்ஷ்டம், அமானுஷ்யம் இதையெல்லாம் ஒரு அளவுக்கு மேலே உனக்குள்ளே விடாதே; முயற்சி தன் மெய் வருத்தக் கூலி தரும் சாவித்திரி; உழைப்பு, ஓயாத உழைப்பு, ஒரு முகப்பட்ட உழைப்புதான் ஒரு மனுசனை உயர்த்தும்.

யுபிஎஸ்ஸியில் மாநிலப் பட்டியலில் ஒன்பதாவது இடம் பிடித்து சாதனை செய்ததற்கும் கஜாதான் காரணம் என்பதை மறுபடியும் உறுதி செய்தது சாவித்திரியின் மனம்.

சாவித்திரி ஆறாம் வகுப்பு படித்தபோது, ஐ.டி.ஐ. படித்துக் கொண்டிருந்தான் கஜேந்திரன்.

ஐ.ஐ.டி. படிக்கும் அளவுக்கு மூளை உள்ளவன் கஜா.

ஏழ்மையான குடும்பச் சூழல். ஐ டி ஐல் தள்ளியது அவனை.

சரக்கு மாஸ்டர் சுந்தரமும், கொல்லுப் பட்டரை ராசய்யாவும் நண்பர்கள்.

எனவே, சுந்தரம் ராசய்யாவின் மகன் கஜேந்திரனிடம் கேட்டுக் கொண்டதன் பேரில், ஒவ்வொரு நாளும் மாலை ஐந்து மணி முதல் ஏழு மணி வரை, சாவித்திரிக்கு டியூஷன் எடுத்தான் கஜா.

டியூஷன் என்றால், 'ப்ரொபஷனாலாக' இல்லை.