விஜய்க்கு விழும் ஓட்டுகள் விஜய்க்கு சேருமா?

ஒன்றிய, மாநில ஆளுங்கட்சிகளான பாஜக, திமுகவுக்கு எதிராக தனது அரசியல் பயணம் இருக்கும் என முதல் மாநாட்டிலேயே வீரமாக அறிவித்து, தீவிரமாக வேலை செய்துவரும் விஜய், மாவட்ட செயலாளர்கள் நியமனம், மண்டல வாரியாக பூத் கமிட்டி ஆலோசனைக் கூட்டம் என படிப்படியாக முன்னேறி வருகிறார்.

- பரிதிபாலன்

கடந்த மாதத்தில் கோவையில் நடைபெற்ற பூத் கமிட்டி மாநாடு பிரம்மாண்டமாக அமைந்ததில் விஜய்க்கு ஈடில்லா மகிழ்ச்சி. அடுத்து மதுரை பூத் கமிட்டி ஏற்பாடு நடந்துவருகிறது.

தேர்தல் அரசியலின் அடித்தளமே பூத் கமிட்டிகள் என்னும் வாக்குச்சாவடிக் குழுக்கள் தாம். படித்த பாடத்தை விடைத்தாளில் வடிக்கும் வேலையை அது தான் செய்யும்.

பாஜக, காங்கிரஸ் உள்ளிட்ட இந்திய ஒன்றிய கட்சிகள் பலவும் மாநிலக்கட்சி களுடன் கூட்டு வைப்பதற்கு காரணமே அவர்களுக்கு பூத் கமிட்டி பலம் இல்லாததுதான். அவ்வாறிருக்க, தொடக்க நிலையிலேயே சாவடிகள் தோறும் வாக்கு குழு அமைக்கும் பாக்கியம் விஜய் கட்சிக்கு கிடைத்துள்ளது.

அதுமட்டுமல்ல, மற்ற கட்சிகள் மாநாடு மீட்டிங் என அறிவித்தால் கூட்டம் கூட்ட எவ்வளவு செலவழிக்கிறார்கள் என்பது ஊரறிந்த விஷயம். ஆனால், விஜய் ஊர்விட்டு ஊர்செல்கிறார் என்றாலே... அவ்வூரில் மாநாடு போன்று தானாகவே சேரும் கூட்டத்தை எல்லோரும் ஆச்சரியமாக பார்க்கின்றனர்.

உச்ச நட்சத்திரம் என்பதால் இப்படி கூட்டம் சேர்கிறது என்று நினைக்கலாம். ஆனால், இந்த கூட்டம் விஜய்யின் அரசியல் நிலைப்பாட்டிற்கு ஆதரவு கொடுத்து உடன் செல்லும் கூட்டம் என்பது மற்ற அரசியல் கட்சியினர் வெளியே சொல்லாவிட்டாலும் உள்ளுக்குள் உணர்ந்துதான் இருக்கின்றனர்.

விஜய்க்கு ஆதரவாக கேன்வாஸ் செய்ய வீதிதோறும் அல்ல, வீடு தோறும் ஆட்கள் இருக்கிறார்கள் என்ற உண்மையை உணர்ந்தால் விஜய்க்கு தேர்தல் வாய்ப்பு என்னவென்பது தெரியும்.

விஜய் மீது எத்தனையோ விமர்சனம் வைத்தாலும், அரசியல் செயல்பாட்டை எவ்வளவோ கேலி செய்தாலும் எதையும் கண்டுகொள்ளாமல் ரசிகர்களாக அல்ல, கட்சிக்காரர்களாக அனைவரும் அலைமோதி வருகின்றனர்.

இவ்வாறாக விஜய்க்கு இருக்கும் தனித்த செல்வாக்கை அறிந்துகொள்ள முடிந்தாலும், கூடுகிற கூட்டமெல்லாம் ஓட்டாகாது என்ற அரசியல் விதிப்படி 'எல்லாம் மாயா' என்று விமர்சனங்களை, சில முன்னோர்களை உதாரணமாகக்கி, விவரிப்பதும் நடந்துதான் வருகிறது.

அவர்கள் ஆயாசப்படுவதிலும் அர்த்தம் உள்ளது. ஆள், அம்பு, சேனை மட்டுமே போர்க்களத்தில் வெற்றியை தீர்மானிக்கலாம். ஏனெனில் அது நேரடியாக மோதும் களம். ஆனால், தேர்தல் களம் மாயாவிப்போர் நடத்தும் மாயாஜாலக்கூடம். இதில், அறுவடையானவற்றை அப்படியே கொண்டு களத்தில் சேர்ப்பது கடினம்.