அமெரிக்கா மிரட்டல் பணிந்ததா இந்தியா ?

அண்மையில் அமெரிக்க வெள்ளை மாளிகைக்கு மோடி விஜயம் செய்தபோது, அவர் அமர வசதியாக நாற்காலியையே நகர்த்திக்கொடுத்தார் அந்நாட்டு அதிபர் டிரம்ப். அப்படி, வாஷிங்டனில் வலயவந்த, நம் மோடியை பார்த்து யாராவது அமெரிக்கவுக்கு அடிபணிபவர் என்று சொல்ல முடியுமா?

- பரிதி

ஆனால், சர்வதேச வர்த்தக ஆராய்ச்சி அமைப்பின் (ஜிடிஆர்ஐ) தலைவர் அஜய் ஸ்ரீவஸ்தவா, “தவறான தரவுகளை பயன்படுத்தி இந்தியாவை பகிரங்கமாக அவமானப்படுத்துகிறார் டிரம்ப்” என்று சொல்லிவிட்டார்.

ஒருவேளை நம் இந்தியர்களை சங்கிலியால் பிணைத்து சரக்கு விமானத்தில் பொருட்களைப்போல் கொண்டுவந்து இறக்கியதை சொல்லியிருப்பாரோ... என்று கருதினால், இது அதற்கும் மேற்பட்ட விவகாரமாக இருக்கிறது.

அமெரிக்க அதிபராக பதவியேற்றுள்ள டிரம்ப், வெளிநாட்டு இறக்குமதி பொருட்கள் மீதான வரி விதிப்பில் அதிரடி மாற்றங்களை கொண்டு வந்துள்ளார்.

அதாவது, ஒரு நாடு எவ்வளவு வரி விதிக்கிறதோ, அதே அளவுக்கு அமெரிக்காவும் பதிலுக்கு வரி விதிக்கும் எனக் கூறியிருக்கிறார்.

இதற்கு சீனா, கனடா ஆகிய நாடுகள் பதிலடி கொடுத்துள்ளன. அதாவது, அதிரடி நடவடிக்கையாக அமெரிக்காவின் இறக்குமதிக்கு கூடுதல் வரிகளை விதிப்பதாக அறிவித்துள்ளன.

ஆனால், இந்தியாவோ, அமெரிக்காவுடன் பேச்சுவார்த்தையில் இறங்கியுள்ளதோடு, அமெரிக்க பொருட்களுக்கான இறக்குமதி வரியை குறைப்பதற்கும் முடிவு செய்துள்ளது.

ஆனால், தொடர்ந்து இந்தியாவை அவமானப்படுத்தும் டிரம்புடன் வர்த்தக பேச்சுவார்த்தை நடத்தக்கூடாது என்றும், பதிலடி கொடுக்கும் வகையில் இந்தியாவும் வரிகளை அறிவிக்க வேண்டும் எனவும் சர்வதேச வர்த்தக ஆராய்ச்சி அமைப்பின் (ஜிடிஆர்ஐ) தலைவர் அஜய் ஸ்ரீவஸ்தவா ஆலோசனை வெளியிட்டுள்ளார்.

இந்தியாவில் விவசாய பொருட்களின் இறக்குமதிக்கு உள்ள கட்டுப்பாடுகளை நீக்க வேண்டும். இதற்காக வேளாண் சந்தையை திறக்க வேண்டும் என அமெரிக்கா வலியுறுத்தி வருகிறது. இதை இந்தியா ஏற்கக்கூடாது என்றும், அவ்வாறு வேளாண் சந்தையை திறந்துவிட்டால் இந்தியாவுக்கு சிக்கலை ஏற்படுத்திவிடும் என்று அவர் அளிக்கும் விளக்கமும் ஏற்புடையதாக இருக்கிறது.