மீண்டும் ஒரு விவாகரத்து...நடிகையை பிரியும் கிரிக்கெட் வீரர்!

இந்திய கிரிக்கெட் வீரர் யுஸ்வேந்திர சாஹல் பெயர் கடந்த சில வாரங்களாக டிரெண்டிங்கில் இருக்கிறது. இதற்கு முக்கியமான காரணம், சாஹல் அவரது காதல் மனைவி தனஸ்ரீ வர்மாவை பிரியப் போவதாக அறிவித்தது தான். சாஹல் - தனஸ்ரீ பிரிவுக்கு காரணம் என்ன என்ற கேள்விக்கு தெளிவான பதிலில்லை.

- தவா

பிரபல கிரிக்கெட் வீரர் முகமது ஷமி, அவருக்கு எதிராக மனைவி கூறிய புகார்களால் உடைந்து போய் கைது நடவடிக்கையையும் எதிர்கொண்டார்.

அடுத்து ஆல் ரவுண்டர் ஹர்திக் பாண்டியா தன் மனைவி நடாஷாவை விவாகரத்து செய்தார்.

ஏற்கனவே திருமணமான பெண்ணை கல்யாணம் செய்த ஷிகர் தவான், மனைவி முதல் கணவருடன் சென்று விட்டதால் அவரை விவாகரத்து செய்து விட்டார். இந்த வரிசையில் இப்போது சாஹல் சேர்ந்துள்ளார்.

சுழற்பந்து வீச்சாளரான 34 வயது சாஹல் இந்திய அணிக்காக 72 ஒரு நாள் போட்டிகளில் விளையாடி 121 விக்கெட்களும், 80 டி20 போட்டிகளில் விளையாடி 96 விக்கெட்களும் வீழ்த்தி இருக்கிறார். அது மட்டும் இல்லாமல் ஐபிஎல் தொடரில் 160 போட்டியில் விளையாடி 205 விக்கெட்டுகள் வீழ்த்தி இருக்கிறார். ஐ.பி.எல். கிரிக்கெட்டில் அதிக விக்கெட்டுகளை வீழ்த்திய பவுலராக சாஹல் உள்ளார்.

இத்தனை சாதனைகளை நிகழ்த்தி இருந்தாலும் அவர் 2023 ஆகஸ்ட் மாதம் தான் கடைசியாக இந்திய அணிக்காக விளையாடியுள்ளார். ஒன்றரை ஆண்டுகளாக இந்திய அணியில் அவர் ஒரு போட்டியில் கூட விளையாடவில்லை. டி20 உலக கோப்பை தொடரில் சாஹல் இடம் பெற்றிருந்த போதும் அவருக்கு ஆடும் லெவன் அணியில் வாய்ப்பு கிடைக்கவில்லை.

இந்திய அணியில் இடம் பிடிக்க வேண்டும் என தீவிரமாக முயற்சி செய்து வரும் சாஹல், சையது முஸ்தாக் அலி தொடரில் 10 விக்கெட்டுகளை கைப்பற்றினார். ஆனால் தற்போது விஜய் ஹசாரே கோப்பை தொடரில் கூட சாஹல் இடம் பெறவில்லை. சிறப்பாக விளையாடிக் கொண்டிருந்த சாஹல் திடீரென பார்ம் அவுட் ஆகி அணியில் இருந்து வெளியேற்றப்பட்டதற்கு அவரது சொந்த வாழ்வில் நடந்த பிரச்சினைகளும் முக்கியமான காரணம். யுஸ்வேந்திர சாஹலுக்கும் யூடியூபரும் நடனக் கலைஞருமான தனஸ்ரீ வர்மாவுக்கும் கடந்த 2020-ஆம் ஆண்டு திருமணம் நிச்சயிக்கப்பட்டு அதே ஆண்டு டிசம்பர் மாதம் திருமணம் நடைபெற்றது.

கிரிக்கெட் துறையில் கால் பதிப்பதற்கு முன்னரே செஸ் விளையாட்டில் ஆர்வம் செலுத்திய சாஹல், உலக இளைஞர் செஸ் சாம்பியன்ஷிப்புக்காக இந்தியா சார்பில் விளையாடியுள்ளார். தேசிய அளவில் 12 வயதிற்கு உட்பட்டோர் மற்றும் 16 வயதிற்குட்பட்டோருக்கான பிரிவில் இந்தியாவிற்காக விளையாடிய இவர் 12 வயதுக்குட்பட்டோருக்கான செஸ் போட்டியில் சாம்பியன் பட்டம் வென்றுள்ளார்.