வெட்டிச்செலவு செய்யும் இந்தியர்கள்!

ஒரு காலத்தில் ஒவ்வொரு காசையும் எண்ணியும், யோசித்தும் செலவழித்த நம்மவர்கள், இப்போது 'பட், பட்' டென்று செலவழித்து தள்ளுகிறார்கள். காரணம் யுபிஐ என்னும் டிஜிட்டல் பேமெண்ட்.

- பரிதி

டிஜிட்டல் பேமெண்ட்...

யுபிஐ எனப்படும் 'யுனிஃபைட் பேமென்ட் இன்டர்ஃபேஸ்' என்பது நேஷனல் பேமெண்ட்ஸ் கார்ப்பரேஷன் ஆஃப் இந்தியா (என்பிசிஐ) உருவாக்கிய பணப் பரிவர்த்தனை முறை. இது ஸ்மார்ட் 'ஃபோன்களைப் பயன்படுத்தி வங்கிக் கணக்கு களுக்கு இடையே உடனடியாக பணத்தை மாற்ற உதவுகிறது. இதன்மூலம் பல வங்கிக் கணக்குகளை ஒரே மொபைல் ஃபோனில் இணைக்க முடிவதால் தடையின்றி பணம் செலுத்த முடிகிறது. அதாவது அடிப்படையில் யுபிஐ நம் பணத்தை செலவழிக்கத் தூண்டும் வகையில் வடிவமைக்கப்பட்ட ஒரு பரிவர்த்தனை முறை.

வங்கிக்கு நேரில் சென்று பணம் எடுக்கவேண்டியதில்லை, கொடுப்போருக்கு நேரில் சென்று கொடுக்க வேண்டியதில்லை. உடல்ரீதியான உழைப்பு மிச்சப்படுவதோடு, காசோலை போன்றவை தேவையில்லை.

அது மட்டுமல்ல, ஒவ்வொரு பரிவர்த்தனைக்கும் ஒரு தனிப்பட்ட மெய்நிகர் கட்டண முகவரி (விபிஏ) மற்றும் தனிப்பட்ட அடையாள எண் (பின்) இருப்பதால் பணம் பாதுகாப்பாக இருப்பது உறுதி செய்யப்படுகிறது. கையில், வீட்டில் வைத்திருப்பதால் ஏற்படும் திருட்டு பயம் நீங்குகிறது. எனவே, யுபிஐ முறைக்கு எளிதாக அனைவரும் மாறிவிடுகின்றனர்.

யுபிஐ யில் ஒரு ரூபாய் முதல் லட்சங்கள் வரை எளிதாக பணப் பரிவர்த்தனை செய்ய முடிகிறது என்பதால் எந்தக் காரியத்துக்கும் கைபேசியை நோக்கி கை நீண்டு விடுகிறது.

யுபிஐ வந்த பிறகு கையில் காசு இருப்பதில்லை என்பது ஒருபுறமிருக்க... வங்கிக் கணக்கிலும் காசு இருக்க விடுவதில்லை என்பது நிதர்சனமாகிவருகிறது. இதை சமீபத்திய ஓர் ஆய்வு தெளிவுபடுத்தியுள்ளது.

டெல்லி இந்திரபிரஸ்தா இன்ஸ்டிடியூட் ஆஃப் இன்ஃபர்மேசன் டெக்னாலஜி (ஐஐஐடி) மேற்கொண்ட ஓர் ஆய்வில், யுபிஐ பணப் பரிவர்த்தனைக்கு பிறகு ஏறத்தாழ 74 சதவிகிதம் மக்கள் தேவைக்கு அதிகமாக செலவிடுவது தெரிய வந்துள்ளது.