கலப்பட மசாலா...கவனம்?

மசாலா இல்லமல் நமது உணவு எதுவும் இல்லை. உலகளவில் பாரம்பரிய உணவுகள் அனைத்திலும் ஏதாவது ஒரு மசாலா சேர்க்கப்பட்டு இருக்கும். உணவிலிருந்து ரிக்க முடியாத இந்த மசாலாவிலும் கலப்படக் கைவண்ணம் காட்டிவிட்டனர்.

- 

பிரபல நிறுவனங்களில் பெயரில் போலி உணவுப் பொருட்களை தயாரித்து விற்பனை செய்யும் சம்பவங்கள் சமீப காலமாக அதிகரித்து வருகிறது. அந்த வகையில் டெல்லியுன் வடகிழக்கு பகுதியில் தொழிற்சாலை அமைத்து கலப்படம் செய்யப்பட்ட மசாலா பொருட்களை தயாரித்து விற்பனை செய்தவர்களை அண்மையில் போலீசார் கைது செய்துள்ளனர்.

அந்தப் போலி தயாரிப்பாளர்கள், மரத்தூள், ஆசிட் உள்ளிட்ட சில தேவையற்ற பொருட்களை கலந்து மசாலாவாக்கி பல்வேறு முன்னணி நிறுவனங்களின பெயர்களில் போலி மசாலா பொருட்களை தயாரித்து டெல்லி சுற்றுவட்டார பகுதிகளில் உள்ள கடைகள் மூலம் விற்பனை செய்துள்ளனர்.

இந்த சம்பவம் தொடர்பாக தொழிற்சாலையின் உரிமையாளர்களான திலிப் சிங் (46), சர்ஃப்ராஜ் (32) ஆகியோரையும் போலி மசாலாப் பொருட்களை அருகிலுள்ள கடைகளுக்கு விற்று வந்த குர்ஷித் மாலிக் (42) என்பவரையும் போலீஸார் கைது செய்துள்ளனர்.

இவர்களிடமிருந்து 1,2 அல்ல, 15 டன் எடையுள்ள போலி மசாலா பொருட்கள் பறிமுதல் செய்யப்பட்டுள்ளன.

அதுமட்டுமின்றி, மசாலா பொருட்களில் கலப்படம் செய்வதற்காக வைக்கப்பட்டிருந்த 7,215 கிலோ எடையிலான கெட்டுப்போன அரிசி, சிறு தானியங்கள், தேங்காய்கள், மல்லி விதைகள், குறைந்த தரத்திலான மஞ்சள், யூகலிப்டஸ் இலைகள், மரத்தூள், சிட்ரிக் ஆசிட் மற்றும் தடை செய்யப்பட்ட செயற்கை நிறமிகள் ஆகியவற்றை போலீஸார் பறிமுதல் செய்துள்ளனர்.

இங்கு பிரபல நிறுவனங்களின் மசாலாக்களை எல்லாம் போலியாக தயரித்துக் கொண்டிருக்கும் வேளையில், வெளிநாட்டில் நம் பிரபல நிறுவனங்களின் மசாலாக்களையே போலி என சொல்லிக் கொண்டிருக்கின்றனர்.